Հրանդ Տինք Հիմնարկի 2014-էն շարունակուող Մշակութային Ժառանգութեան ծրագիրը այս շաբաթ պիտի իրականացնէ իր առաջին աշխատանոցը, խորագրուած՝ «Մշակութային Ժառանգութիւն՝ եզրեր, հարցադրումներ եւ Թուրքիայէն օրինակներ»։ Աշխատանոցը կը ձգտի երեք հարցադրումներու շուրջ արծարծումներ կատարել։ Ի՞նչ է մշակութային ժառանգութիւնը տարբեր գիտական ճիւղերու համար։ Մշակութային ժառանգութիւնը ի՞նչ հիմունքներու վրայ կարելի է պահպանել եւ սեփականացնել։ Ի՞նչ է Թուրքիոյ տարածքին մշակութային ժառանգութեան աշխատանքներուն տարողութիւնը եւ ի՞նչ են մարտահրաւէրները։
Հրանդ Տինք Հիմնարկի 2014-էն շարունակուող Մշակութային Ժառանգութեան ծրագիրը այս շաբաթ պիտի իրականացնէ իր առաջին աշխատանոցը, խորագրուած՝ «Մշակութային Ժառանգութիւն՝ եզրեր, հարցադրումներ եւ Թուրքիայէն օրինակներ»։ Աշխատանոցը կը ձգտի երեք հարցադրումներու շուրջ արծարծումներ կատարել։ Ի՞նչ է մշակութային ժառանգութիւնը տարբեր գիտական ճիւղերու համար։ Մշակութային ժառանգութիւնը ի՞նչ հիմունքներու վրայ կարելի է պահպանել եւ սեփականացնել։ Ի՞նչ է Թուրքիոյ տարածքին մշակութային ժառանգութեան աշխատանքներուն տարողութիւնը եւ ի՞նչ են մարտահրաւէրները։
Երկու օրուան վրայ տարածուած աշխատանոցը բաղկացած է երկու մասերէ, առաջին օրուան ընթացքին տեղի պիտի ունենան վեց նիստեր։ Պողազիչի Համալսարանի պատմութեան բաժինի դասախօս Անէսթիս Վասիլաքէրիսի ղեկավարութեամբ, առաջին նիստին կը զեկուցէ Կիպրոսի Համալսարանէն ժամանած Թոմաս Սինքլէյր, որ կը խօսի մշակութային ժառանգութեան սահմանումին եւ դասակարգումին մասին։ Ապա խօսք կ՚առնէ Միմար Սինան գեղարուեստի համալսարանէն Քորհան Կիւմիւշ, որ կը խօսի մշակութային ժառանգութեան մասին, որպէս մասնակցութեան կիրառում։ Առաջին նիստը կը փակուի Կալաթասարայի Համալսարանէն Նիլկիւն Թութալ Չէվիրոնի Թուրքիոյ մէջ զբօսաշրջիկութեան քաղաքականութեան մասին զեկոյցով։
Երկրորդ նիստի ղեկավարն է Եւրոպա-Նոսթրա կազմակերպութեան Թուրքիոյ մասնաճիւղէն Ըշըք Այտէմիր։ Առաջին զեկոյցը Միջին Արեւելքի Ճարտարարուեստի Համալսարանէն (ODTÜ) կը ներկայացնէ Չիտէմ Աթաքուման, որ կը խօսի Թուրքիոյ մէջ մշակութային ժառանգութեան պատմութեան, սահմանումին եւ արժեւորումին մասին։ Երկրորդ զեկուցողն է ճարտարապետ եւ վերանորոգութեան մասնագէտ Ալին Փոնթիօղլու, որ կը ներկայացնէ Էլազըղ նահանգը որպէս օրինակ մշակութային ժառանգութեան տեղեկագրելու աշխատութեան։ Երրորդ եւ վերջին նիստին Յունաստանէն ժամանած Եւորպա-Նոսթրա կազմակերպութեան ներկայացուցիչ Կոստաս Սթամաթոպուլոս կը ներկայացնէ Եւրոպա-Նոսթրա կազմակերպութեան գործունէութիւնը Թուրքիոյ մէջ։
Աշխատանոցի երկրորդ օրուան ծրագիրը կը կազմէ վարժանիստ մը, որուն ընթացքին Հիմնարկի Մշակութային Ժառանգութեան ծրագիրի աշխատակիցները կը ներկայացնեն չորս տարբեր պարագաներ իրենց աշխատած մշակութային ժառանգութեան ցանկերուն ընդմէջէն։ Նիստին մասնակից կ՚ըլլան Թուրքիոյ համալսարաններէն բարձր կրթութեան ուսանողներ, որոնք խումբերով, փրոֆէօսորներու առաջնորդութեամբ, լուծումներ պիտի ներկայացնեն մշակութային ժառանգութեան պատկանելութեան, գործածութեան, վերարժեւորումի եւ պահպանութեան վերաբերեալ։
