Քաղաքակրթութեան նուաճումներու դիմաց մարդոց մտաբերած առաջին խորհուրդներէն մէկը եղաւ «աշխարհ փոքրացաւ» համոզումը։ Շոգենաւերը շատ աւելի արագընթաց էին բաղդատմամբ առագաստանաւերու։ Շոգեկառքերը նոյնպէս։ Վրայ հասաւ պէնզինով բանող շարժակները։ Ճանապարհները համապատասխան կերպով ասֆալթապատուեցան եւ շաբաթներով հաշուող հեռաւորութիւնները սկսաւ օրերով հաշւուիլ։ Իսկ գալով մեր օրերուն, այդ նոյն ճանապարհները կը հաշւուին ժամերով, նոյնիսկ թղթատարութեան պարագային վայրկեաններով միայն։
Աշխարհ փոքրացաւ եւ քրտաբնակ սահմանամերձ տարածքներու մէջ զինուորներու փամփուշտով սատկած քանի մը ջորիի մասին մարդիկ նոյն պահուն մեկնաբանութիւններ կ՚ընեն հատելով ովկիանոսները։
Մամուլ բառը իր յօրինուած օրերուն կը բացատրէր գրաւոր լրատուամիջոցները։ Ապա գրաւորին վրայ աւելցաւ ձայնաւորը եւ աւելի ետք ալ ապրեցանք նկարներու հեռարձակումը։ Այս ոդիսականի ընթացքին նկատեցինք թէ մամուլ բառը կորսնցուցած է գործածութեան դաշտը, իւրացնելով «մետիա» բացատրութիւնը։
Գրաւոր լրատուամիջոցները, երբ մամուլ կը կոչուէին ունէին նաեւ իրենց յատուկ բարոյական սկզբունքներ ու կանոններ։ Կը յարգէին ընթերցողին իմանալու, տեղեակ դառնալու իրաւունքը։ Այդ իրաւունքը երբեք կախեալ չէր խմբագիրներու նախասիրութենէն։ Իրենց վիճակածը լուր հաղորդել էր, այլ ոչ թէ քօղարկել կամ անտեսել։
Մետիան երբեք չունեցաւ այս պատասխանատուութիւնը։ Ան կաշկանդուած էր որոշ շահերով եւ ակնկալութիւններով։ Այս հանգամանքով թերթերը կորսնցուցին իրենց հաւաստիութիւնը։ Մարդիկ նախապէս եղելութեան մը ճշգրտութիւնը կը դատէին թերթին մէջ գրուած ըլլալով։ Համոզուած էին որ այն ինչ որ թուղթի յանձնուած է, չի կրնար սուտ կամ սխալ ըլլալ։ Մետիայի լրատուամիջոցները ապականող այս շեղումը շատ անգամ կը բացատրուի այն իրողութեամբ, թէ թերթերը կը հրատարակէին խմբագիրները, իսկ մետիայի հրատարակութիւնը ստուգողը գործատէրներն են։ Անոնք բացի լրագրի կամ հեռուստակայանի մը սեփականատէրը ըլլալէ, կը վարեն մեծ ընկերութիւններ եւ հսկայ գումարներով գործեր կը ստանան կառավարութենէն։ Այս շահերու պատճառաւ ալ կ՚ենթարկուին իշխանութիւններու հրամանին։ Որքան ալ բարոյական առումով անընդունելի ըլլայ, գործնական իմաստով կարելի է հասկնալ այս իրավիճակը։
Բայց ինչպէ՞ս արդարացնել քաղաքիս հայերէն օրաթերթերու պահած լռութիւնը իր հարազատ ժողովուրդին համար խիստ էական նիւթի մը շուրջ։ Երկու շաբաթ առաջ քանդիչ սարքեր խորտակեցին Գամփ Արմէնի արդէն գրաւուած շէնքը։ Նոյն օր կարգ մը հեռուստաընկերութիւններ նախ ներքնագիրերու դրութեամբ, ապա թղթակիցներու վկայութեամբ լուրեր հաղորդեցին Թուզլայի հայ մանկանց ճամբարէն։ Մեր օրաթերթերէն միայն մէկը երկօրեայ լռութենէ ետք հազիւ վարչապետ Տաւութօղլու այս մասին յայտարարութիւնով անդրադարձաւ դէպքին։ Յաջորդող օրերուն ալ դարձեալ զարտուղի լրատուութիւններով շարունակուեցան այդ վարանոտ լրատուութիւնները։ Իսկ երկրորդ օրաթերթը մինչեւ օրս կը պահէ քար լռութիւն այս նիւթին շուրջ։
Միւս կողմէ սփիւռքահայ մամուլը մեծ ուշադրութեամբ կը հետեւի Քամփ Արմէնի թալանման դէմ քաջարի դիմադրութիւն ցուցաբերող Նոր Զարթօնք շարժումի ձեռքբերումներուն։
Մենք յիշեցնելով գոհանանք, խմբագիրը իր գրածով ու չգրածով կրնայ մեղադրուիլ հարիւր տարի ետք ալ։ Չէ որ գիրը կը մնայ, նոյնիսկ եթէ բացակայ ըլլայ։