ՊՈՒՐԱԿ ՖԸՐԹԸՆԱ
buragfirtina@gmail.com
Անուանի ըմբշտամարտիկ Լեւոն Ջուլֆալակեանի երկու որդիները Արսէն եւ Արամ Իսթանպուլի մէջ մասնակցեցան Վէհպի Էմրէ-Համիտ Գափլան 34-րդ Միջազգային Մրցումներուն։ Յունահռոմէական ոճի մէջ Արսէն Ջուլֆալակեան յաղթելով իր չորս մրցակիցները արժանացաւ ոսկեայ մետայլի։ Իսկ եղբայրը Արամ, առաջին մրցումին պարտուելով դուրս մնաց աստիճանակարգէ։ Այս առթիւ Սեւ Ծովեան Տնտեսական Համագործակցութեան շրջագըծով Հայաստանի ներկայացուցչութեան մէջ զրուցեցինք երկու եղբայրներու հետ, անոնցմէ լսելով այս մրցաշարքի մասին իրենց տպաւորութիւնը եւ ապագայի ծրագիրները։ Արսէն Ջուլֆալակեան յայտնեց, թէ Հայաստանի ազգային հաւաքականը ներկայացնելով եկած են Իսթանպուլ իրենց մարզիչի Արամ Գասպարեանի հետ։ «Իմ քաշի խմբաւորումին մէջ եւրոպական կամ ողիմպիական յաջողութիւններ արձանագրած ըմբիշտներ կային։ Հայաստանի ըմբիշտներս առաջին անգամ է, որ կը մասնակցինք այս մրցումին։ Նկատեցի, որ կազմակերպիչներն ալ ոգեւորուած են մեր մասնակցութենէն։ Քաջ տեղեակ էին թէ հօրս եւ թէ իմ նախկին յաջողութիւններուն վերաբերեալ։ Իրենց պարբերաթերթին մէջ ալ մեզ ծանօթացնող յօդուած կար։ Շատ լաւ պայմաններու մէջ հիւրընկալուեցանք։ Թուրքիոյ մէջ ըմբշամարտը բաւական սիրուած ոճ է։ Նախորդ Նախագահ Ապտուլլահ Կիւլն ալ ըմբիշտ մըն էր։ Բոլոր ըմբիշտներու նկատմամբ յարգանք ունէին։ Շատ ուրախալի է արդար մրցումներու մէջ յաղթանակ տանիլը»։
Արամ Ջուլֆալակեան ալ կը բաժնէ իր եղբօր համոզումները եւ ան կ՚ափսոսայ, թէ առաջին մրցումին պարտութիւն կրելով չէ յաջողած մետայլ նուաճելու։ «Մանաւանդ Թուրքիոյ եւ Ատրպէյճանի մէջ մետայլ նուաճելը շատ կարեւոր է։ Հայ ժողովուրդը կ՚ուրախանայ մեր յաջողութիւններով։ Գալով յառաջիկայ տարի դարձեալ մասնակցելու մասին ձեր հարցումին, ատիկա կախեալ է գալ տարուայ մրցումներու օրացոյցէն։ Ընդհանրապէս շատ ծանրաբեռնուած օրացոյց մը կ՚ունենանք։ Յաջորդ մրցաշարքը երկու ամիս վերջ է, այս իմաստով ալ շատ յարմար թուական մը եղաւ Թուրքիոյ մրցումները։ Եթէ յառաջիկայ տարի ալ նոյնը պատահի, դարձեալ կու գանք։ Հայաստանի մէջ յունահռոմէական ոճի ըմբշամարտով կարեւոր յաջողութիւններ արձանագրուած է։ Բազմաթիւ ողիմպիական մետայլներ ունինք, որոնք կը փորձենք պսակել ոսկեայ մետայլով»։