ՎԱՐԴԱՆ ԷՍԴՈՒԳԵԱՆ
estukyan@gmail.com
«Զիրաաթ»ի Թուրքիոյ Բաժակի մրցումները անակնկալներով կը շարունակուին։ Վիճակահանութեամբ յայտնի եղաւ քառորդ եզրափակիչի մրցակից խումբերը։ Նախորդ շաբաթ, իր մասին ամենաշատ խօսուած «Ամէտսփոր» քառորդ եզրափակիչ փուլին պիտի մրցի Ֆէնէրպահչէ ֆութպոլի ակումբին հետ։ Վիճակահանութենէն քանի մը ժամ ետք Թուրքիոյ Ֆութպոլի Ֆէտէրացիան պատիժներ տնօրինեց Ամէտսփորի դէմ։ Այսպէս ան քառորդ եզրափակիչի մրցումին երկրպագուներու զօրակցութենէն զուրկ պիտի մնայ Ֆէնէրպահչէի դիմաց։
Ազգայնական շրջանակներ Պուրսասփորի դէմ արձանագրած յաղթանակէն ետք կրակ կը ժայթքէն քրտաբնակ քաղաքի մը ներկայացուցիչը հանդիսացող այս ակումբին հանդէպ։ Նախատինքները գլխաւորաբար կ՚ուղղուին խումբի յաջողագոյն մարզիկներէն Տէնիզ Նաքիի։ Այս վերջինս Պուրսասփորը տապալող կոլը արձանագըրելէ ետք ձեռքերով յաղթանակի նշած ըրած եւ ապա յայտարարած էր, որ այս կոլը կը ձօնէ Ճիզիր, Սուր եւ Սիլոփիի մէջ զոհուած քիւրտերուն։ Նախատինքներու եւ հայհոյանքներու տարափին դէմ, Ամէտսփորին զօրակցողներն ալ քիչ չեն։ ՃՀՓ կուսակցութեան պատգամաւոր՝ Սէզկին Թանրըքուլու Թուիթըրի մէջ կը գրէր հետեւեալը՝ «հիւրախաղերուն երկրպագուներու արգելք, իր դաշտի մրցումներուն կողմնակիցներու արգելք, եթէ աս ալ չբաւէր, գոնէ դաշտի ելլալու արգելք հռչակեցէք»։
Ֆէտէրացիայի տնօրինած պատիժէն ետք, ակումբի նախագահ Նուրուլլահ Էտէմէն բողոքեց որոշումին դէմ։ «Եթէ մրցակիցը Ֆէնէրպահչէ չըլլար նման պատիժ մը չէին տար։ Սպասեցին որ մրցակիցը յայտնի ըլլայ։ Պիտի առարկենք այս որոշումին դէմ եւ եթէ մեր առարկութիւնը նկատի չունենան, դաշտ չենք ելլեր»։
Տէնիզ Նաքի Գերմանիայէն Ամիտա
Ամէտսփորի փայլուն աստղը Տէնիզ Նաքի արհեստավարժ ֆութպոլի կեանքին սկսաւ Գերմանիոյ «Ռոտ Վէյս Ահլէն» ակումբին մէջ։ Յաջորդ եղանակին ան փոխանցուեցաւ «Սէն Փոլի», ուր պաշտօնավարած երեք տարիներու ընթացքին իր անունը սկսաւ հետզհետէ փայլիլ։
«Փատէրպորն»ի մէջ ալ խաղալէ ետք, 2013-2014 տարեշրջանին Նաքի փոխանցուեցաւ Կենչլէրպիրլիղի ակումբ։ Այստեղ իր ալէվի ինքնութեան հետեւանքով խտրականութեան եւ բիրտ յարձակումներու ենթարկուեցաւ։ Այս դէպքէն ետք Նաքի ջնջեց իր համաձայնագիրը եւ երկրէն հեռացաւ։ Ան 2015-2016 տարեշրջանին կը խաղար Ամէտսփորի կազմին մէջ։
