Հայաստանի Հանրապետութեան Կրթութեան եւ Գիտութեան Նախարարութեան կազմակերպութեամբ Աղվերանի մէջ կայացաւ 7-րդ կրթական խորհրդաժողովը։ Ժողովի բովանդակութեան մասին տեղեկութիւններ կը փոխանցէ նախկին պոլսահայ, այժմ փարիզաբնակ կրթական գործիչ Կարապետ Տաքեսեան։
«Այս խորհրդաժողովը տեղի կ՚ունենայ երկու տարին անգամ մը։ Խորհրդաժողովին մասնակցեցան 145 կրթական մշակներ։ Անոնցմէ 100-ը սփիւռքի 21 տարբեր համայնքներէն։ Մեծագոյն խմբակը կու գար Ռուսաստանէն 34 մասնակիցներով։ Հայաստանէն 42 ներկայացուցիչներու (ուսուցիչ, գիտնական) մասնակցութիւնը հանդիպումները դարձուցին բաւական հետաքրքրական։ Ընկերային շատ տարբեր մթնոլորտներու մէջ գործող ուսուցիչներու համար օգտաշատ էր մանաւանդ իրենց պատկերացումները բաղդատել իրենց գործակիցներու փորձին հետ։ Ընկերային քաղաքական պայմաններու զանազանութեան յառաջացուցած խնդիրներուն համապատասխանող նիւթերով կայացան աշխատանոցներ որոնց հետեւանք յստակացան առաջնահերթ խնդիրները եւ համապատասխան լուծման առաջարկութիւններ կատարուեցան։ Առաջարկութիւններու եւ հաստատումներու կարգին կրնանք ունենալ հետեւեալները.
1-Ուսուցիչներու վերապատրաստման աշխատանքը կը կազմակերպուի նաեւ գաղթավայրերու մէջ որպէսզի նկատի առնելով գերակայ պայմանները վերապատրաստումը դառնայ աւելի արդիւնաբեր։
2-Բազմիցս շեշտուեցաւ նոր դպրոցի անելի մէջ յայտնուած խնդիրները, այդ խնդիրները լուծելու կենսականութիւնը։ Հոգեբանները առաջարկեցին մասնագէտներու միջնորդութիւնը որպէսզի առողջ եւ արդիւնաբեր համագործակցութիւն վերահաստատուի։
3-Այն համայնքներու ներկայացուցիչները որոնք իրենց համայնքներու դպրոցական կեանքին մասին ընդհանուր պատկերներ ներկայացուցին, ընդգծեցին նաեւ ծնողներու ակնկալութիւնները հայ դպրոցէն։ Ակնկալութիւններ, որոնց իրականացման համար հայ դպրոցը պէտք ունի նեցուկի եւ ծրագրուած նոր աշխատանքի։ Ընդգծուեցաւ սփիւռքի մէջ ծնած ու մեծցած սերունդներու ինքնութեան, հայեցի ինքնութեան վերակազմուելու խնդիրը»։
Համագումարի կազմակերպութեան մասնակիցները պայմանաւորուեցան սոյն խնդիրներու շուրջ խորհրդակցիլ յաջորդ ժողովին, որ պիտի կայանայ երեք տարի ետք։
