Այսօր (16 Օգոստոս 2016) արգելափակուած է անցեալին իմ ալ իբրեւ գլխաւոր խմբագիր եւ սիւնակագիր աշխատակցած «Էօզկիւր Կիւնտէմ» (Ազատ Օրակարգ) օրաթերթը։
Ոստիկան կոչեալ խուժանը խմբագրատուն յարձակեցան, լրագրող գործընկերներս խոշտանգելով բերման ենթարկեցին։ Անոնց մէջ էին գլխաւոր խմբագիր Զանա Քայա, հաստատութեան տնօրէն Տավութ Ուչար, մեկնաբան Պայրամ Պալճը, երգիծանկարիչ Տողան Կիւզել եւ բանաստեղծ Մ. Էնտէր Էօնտէշ։
Յարձակումներ գործուեցան թերթի նախկին գլխաւոր խմբագիրներէն Էրէն Քեսկինի եւ սիւնակագիր Ֆիլիզ Քոչալիի բնակարաններուն։
Իմ օրինական բնակարանը համարելով յարձակում մըն ալ գործուեցաւ որդւոյս բնակարանին վրայ։ Ոստիկան կոչեալ հրոսախումբը խորտակեց տան դուռը եւ գրաւեց իմ թարգմանած, հրատարակած եւ որդւոյս նուիրած գիրքերը, որոնք նիւթ ունէին հայոց, պոնտացիներու եւ ասորիներու դէմ գործադրուած ցեղասպանութիւնները։
Կը բողոքեմ այս բարբարոս արարքներուն դէմ։
Քառասուն տարիներ դատուեցայ մամուլի դատերով...Դատախազութիւնը բազում անգամներ զիս հրաւիրեց հարցաքննութեան։ Ամէն անգամուն գացի եւ անիմաստ մեղադրանքներու դէմ գրածներս պաշտպանեցի...
Ներառեալ 90-ական տարիներու կեղտոտ պատերազմի օրերը՝ նման խայտառակութիւն չեմ տեսած։
Յաղթանակը, Իրողութիւնը, մարդկութիւնը, ազատութիւնը եւ ժողովրդավարութիւնը պիտի յաղթանակէ, ո՛չ թէ բարբարոսութիւնը, ցեղապաշտութիւնը, գիրքի թշնամութիւնը։
Ռակըպ Զարաքօլու
16 Օգոստոս 2016
Սթոքհոլմ
