Պոլսո հայոց պատրիարքարանը դատապարտել է Բեշիկթաշի պայթյունները

Թուրքիայի հայոց պատրիարքարանը դատապարտել է շաբաթ օրը Ստամբուլի Բեշիկթաշ թաղամասում տեղի ունեցած պայթյունները։ Պատրիարքի փոխանորդ արքեպիսկոպոս Արամ Աթեշյանը նամակ է ուղարկել նախագահ Ռեջեփ Թայիփ Էրդողանին։

Թուրքիայի հայոց պատրիարքարանը դատապարտել է օրեր առաջ Բեշիկթաշում տեղի ունեցած պայթյունները։ Պատրիարքարանի ներկայացուցիչները երեկ մասնակցել են պայթյունի հետևանքով զոհվածների հիշատակի արարողություններին, ծաղկեպսակ են դրել պայթյունի վայրում։ 

Կիրակնօրյա պատարագի ընթացքում աղոթքներ են հնչել միասնության, խաղաղության և հանգստության համար։

Գումգափըի Մարիամ Աստվածածին եկեղեցում տեղի ունեցած պատարագը գլխավորել է Պոլսո հայոց պատրիարքական փոխանորդ Արամ Աթեշյանը, ով քարոզի ժամանակ խստորեն դատապարտել է Ստամբուլում իրականացված անմարդկային արարքը։

Պոլսո հայոց պատրիարքական փոխանորդ Արամ Աթեշյանը նաև ցավակցական նամակ է հղել Թուրքիայի նախագահ Էրդողանին։ «Ստամբուլում տեղի ունեցած և մեր ազգի շրջանում վրդովմունք առաջացրած ահաբեկչական հարձակումը մեր քաղաքացիների՝ մեծամասամբ անվտանգության աշխատակիցների մահվան պատճառ է դարձել։ Ցանկանում ենք տեղեկացնել, որ ցավ ենք ապրում տեղի ունեցածի կապակցությամբ։ Ինչպես միշտ ասել ենք՝ ահաբեկչությունը հարձակում է Աստծո կողմից մարդկանց շնորհված կյանքի իրավունքի դեմ։ Մարդու կյանքի դեմ ուղղված նմանատիպ շարժումները, ում կողմից էլ որ իրականացվեն, իրավացիորեն դատապարտվել են ողջամիտ մարդկանց կողմից։ Մեր ցանկությունն է, որ անօգուտ և միայն վնաս պատճառող, մարդկության դեմ ուղղված նմանատիպ հանցագործությունները վերջանան։ Որպես Թուրքիայի հայեր՝ ցանկանում ենք տեղեկացնել, որ միանում ենք մեր երկրի միասնությանը, խաղաղությանն և հանգստությանն ուղղված աղոթքներին։ Զոհված քաղաքացիներին ողորմություն, վիրավորներին էլ շուտափույթ ապաքինում ենք մաղթում»,- նշված է Արամ Աթեշյանի նամակում։   

Kategoriler

ԱՌՕՐԵԱՅ