Յունուար ամիսը Թուրքիոյ մէջ կարծես թէ լրագրողներու սպանութեան առումով խորհրդանշական յատուկ իմաստ մը ունի։ Երկրի կարկառուն լրագրողներու սպանութիւնը ընդհանրապէս տեղի ունեցաւ Յունուար ամսուան ընթացքին։ Ուրեմն չափազանցութիւն պիտի չըլլայ այս առումով Յունուարը տխրահռչակ ամիս համարել։ Բացի «Ակօս»ի գլխաւոր խմբագիր Հրանդ Տինքէն, այս ասպարէզին մէջ հետազօտող լրագրողութեան աւանդի կարեւորագոյն դէմքը Ուղուր Մումճու եւս սպաննուած էր Յունուար ամսուան մէջ։ Ուրեմն բնական էր որ ամիսը պիտի դրոշմուէր նաեւ նահատակուած այս կարեւոր մտաւորականներու յիշատակով։ Ինչպէս նախորդ տարիներուն այս տարի ալ Թուրքիոյ զանազան քաղաքներուն մէջ յատուկ միջոցառումներ տեղի ունեցան զոհուած լրագրողները յիշատակելու համար։ Երկրի մէջ կայացած միջոցառումները կը կայանային բացի Պոլիսէն Անգարա, Զմիւռնիա, Մալաթիա եւ Ատանա։ Բոլոր միջոցառումները անցան խաղաղ պայմաններու տակ։ Միակ բացառութիւնը կացմեց Անգարան քանի որ այս քաղաքին մէջ կուսակալութիւնը նախապէս ամբողջ ամսուան տեւողութեամբ արգիլած էր բոլոր տեսակի ցոյցերը եւ հանրահաւաքները։ Արդարեւ Անգարայի մէջ ոգեկոչման հանդէսը փոխանակ փողոցի վրայ կայանալու, տեղի ունեցաւ Անգարայի Քաղաքական Գիտութիւններու Համալսարանի միութեան մէջ։ Զմիւռնիոյ մէջ Հրանդի ոգեկոչումը զուգադիպեցաւ նաեւ այս քաղաքին մէջ վերջերս համալսարանէն վտարուած դասախօսներու խնդրին հետ։ Այսպէս օրուան ուղերձը արտասանեց Եքէական համալսարանի փիլիսոփայութեան բաժնի դասախօս Փրոֆ. Զերրին Քուրթօղլու։ Մալաթիոյ եւ Ատանայի մէջ ալ Հրանդը յիշատակուեցաւ հրապարակներու վրայ։
Բացի այդ, թուրքիացիներու բնակած Եւրոպայի եւ Միացեալ Նահանգներու զանազան քաղաքներուն մէջ ալ նման բնոյթով հաւաքոյթներ տեղի ունեցան։ Լոնտոնի յիշատակումը կայացաւ Ս. Սարգիս եկեղեցւոյ մէջ, ուր Նուրիցա Մաթոսեան արտայայտուեցաւ Հրանդ Տինքի յատկութիւններուն մասին։ Պերլինի մէջ զոյգ հանդիսութիւններով յիշուեցաւ Հրանդ Տինք։ Զանազան միջոցառումներ կայացաւ նաեւ Փարիզ, Լիոն, Ամստերտամ, Թորոնթօ եւ Վիեննայի մէջ։ Նշենք որ այստեղ յիշուածները միայն իբր տեղեկութիւնը մեզի հասածներն են եւ տասնամեայ փորձառութեամբ գիտենք թէ այս ցանկէն դուրս կը մնայ տակաւին բազմաթիւ միջոցառումներ, որոնք կատարուած են զանազան քաղաքներու մէջ։
Հրանդ Տինքի տարելիցի առթիւ Հայաստանէ ներս ալ բազմաթիւ միջոցառումներ տեղի ունեցան։ Սփիւռքի Նախարարութենէ ներս կատարուած յիշատակման ելոյթ ունեցաւ նախարարուհի Հրանուշ Յակոբեան։ Իսկ նոյն օր երեկոյեան Շարլ Ազնաւուր հրապարակի վրայ Նոր Զարթօնք եւ կարգ մը հայաստանեան հասարակական կազմակերպութիւններ յայտարարութիւններով եւ մոմավառութեամբ յիշատակեցին Հրանդ Տինքը։ Բացի այս, Հայաստանի բազմաթիւ դպրոցներու եւ ԲՈՒՀ-երու մէջ յատուկ միջոցառումներ տեղի ունեցան։
