Միջոցէ մը ի վեր Թուրքիոյ մէջ որոշ մամլոյ գործակալութիւններուն ուղղուած ոստիկանական բռնութեան վերջին զոհը եղաւ ծանօթ մտաւորական Ռակըպ Զարաքօլուի վարած «Պելկէ» հրատարակչատունը։
6 Մայիս Շաբաթ օր մեծ թիւով ոստիկաններ խուժեցին հրատարակչատան Ճաղալօղլուի կեդրոնը եւ գրաւեցին աւելի քան 2,000 գիրքեր։
Ոստիկանները կը յայտնէին, թէ իրենց բողոք յայտնուած է հրատարակչատան մէջ անհրաժեշտ թոյլտուութիւնները չունեցող գիրքերու գոյութեան մասին։ Նաեւ նշած են թէ կան երկու գիրքեր՝ «Քիւրտերը Առանց Պետութեան» եւ «Մահէն Աւելի Դժուար Որոշումներ»։ Ոստիկանները յայտնեցին թէ այս գիրքերուն համար դատախազութիւնը հաւաքման որոշում տուած է եւ իրենք այդ որոշումն է որ կը գործադրեն։ Ոստիկանները հրատարակչատունէն ելլելու ժամանակ բերման ենթարկած են նաեւ աշխատողներէն մէկը՝ Մեհմէտ Ալի Վարըշը։
Հրատարակչատունը այս զարգացումը հրապարակած է «Թուիթըր»ի միջով։
Հրատարակչատունը եղածը կը մեկնաբանէ ոստիկաններուն ձեռնունայն դառնալէ խուսափելու համար դիմած մէկ անօրինականութիւնը ըլլալով։
Հրատարակչատունը իր կատարած յայտարարութեան մէջ կը նշէ, թէ գրանցման պիտակի գործադրութիւնը սկսած է 2000-ական տարեթիւերու սկիզբներուն։ «Սակայն հրատարակչատուներու մօտ կային մեծ քանակութեամբ գիրքեր, որոնք նախապէս տպուած են եւ այդ տեսակ պիտակ մը չունէին։ Այդ տեսակ գիրքերու համար աշխատութիւններ տարուեցան նոր պիտակաւորում մը ապահովելու միտումով։ Այժմ մեր այդ տեսակի գիրքերուն համար է, որ եկած են։ 15-20 տարի առաջ տպուած գիրքերուն հաշիւը կը հարցնեն»։
Այս մասին Հրատարակիչներու Միութիւնն ալ յայտարարութիւն մը կատարած եւ մեղադրած է կատարուածը։ Հոն եւս կը նշուի թէ 15-20 տարի առաջ հրատարակուած գիրքերու դէմ այս վերաբերումը ոչ մէկ տրամաբանական բացատրութիւն ունի։ «Նոյնիսկ իրենց ներկայացուցած պատճառաբանութիւնը բոլորովին անիմաստ է։ -Արգիլուած- գիրքերը միայն 31 օրինակ են, որոնք արխիւային նշանակութիւն ունին։ Մնացած աւելի քան 2,000 գիրքերը, բոլորովին ապօրէն կերպով գրաւուած են կ՚ըսուի Հրատարակչատներու Միութեան յայտարարութեան մէջ»։
Գրողներու Համաշխարհային Pen ընկերութեան Թուրքիոյ մասնաճիւղը եւս քննադատած է կատարուածը, ոստիկաններու այս գրաւումը վանտալիզմ կոչելով։
