Թուրքիոյ հայոց պատրիարքի ընտրութեան խնդիրը կրկին մատնուած է անորոշութեան։ Վերջերս անպաշտօն մեկնաբանութիւններ կը շրջէին կառավարութեան Պատրիարքարանի մէջ ձեւաւորուած Նախաձեռնարկ Մարմնի կարգ մը անդամներուն հանդէպ վերապահութեան մասին։ 12 Սեպտեմբեր Երեքշաբթի յետմիջօրէին Պատրիարքարանի մէջ ժողով մը գումարուեցաւ այս նիւթի քննարկման համար։ Ժողովի աւարտին ընդհանուր համոզումը ձեւաւորուեցաւ Յուլիս ամսու մէջ Իսթանպուլի Կուսակալութեան յանձնուած եւ ընտրութեան հաւանական թուականի մասին նշումներ կատարուած պաշտօնական դիմումին պատասխան սպասելու շուրջ։
«Ակօս» նախորդ շաբաթ կ՚իմացնէր թէ կարգ մը անձեր կը պնդեն Իսթանպուլի Կուսակալին Նախաձեռնարկ Մարմնի կազմէն դժգոհութեան մասին։ Ոմանք կը պնդէին թէ Իսթանպուլի Կուսակալը յայտնած է թէ դժգոհ են Նախաձեռնարկ Մարմինի կարգ մը անուններէն եւ այդ խորհուրդին հետ կարելի չէ ընտրութեան երթալ։
12 Սեպտեմբերին Պատրիարքարանի դահլիճին մէջ գումարուած խորհրդակցական ժողովը կը գլխաւորէր Տեղապահ Գարեգին Արք. Պեքճեան։ Ժողովին մասնակցեցան Կրօնական Ժողովի նախագահ Սահակ Արք. Մաշալեան, Արամ Արք. Աթէշեան, Սուրբ Փրկիչ Հիւանդանոցի հոգաբարձութեան ատենապետ Պետրոս Շիրինօղլու, Գարակէօզեան Որբանոցի խնամակալութեան ատենապետ Տիգրան Կիւլմեզկիլ, բարերարներ՝ Արէտ Էրկան, Հայկ Ասլանեան, Սամաթիոյ Սուրբ Գէորգ Եկեղեցւոյ պատուոյ ատենապետ Մելքոն Գարաքէօսէ, Օրթագիւղի Եկեղեցւոյ թաղականութեան ատենապետ Իսքենտեր Շահինկէօզ, Եէնիգիւղի Եկեղեցւոյ թաղականութենէն Սեւան Շեշետեան, Դպրեվանքի աւագ սաներէն ծանօթ հրատարակիչ Նազար Պիւյիւմ, Կարգադիր Յանձնախումբի կազմէն Խոսրով Քէօլէդաւիթօղլու, Թադէոս Պեպեք եւ Սեպուհ Ասլանկիլ։
Մամուլին փակ այս ժողովը տեւեց երեք ժամ, որմէ ետք ժողովը վերջացաւ առանց պաշտօնական յայտարարութեան։ Լսումներու համաձայն Կուսակալութիւնը իմաց տուած է թէ տակաւին որոշ ժամանակ պատրիարքի ընտրութիւն պիտի չկայանայ։ Նաեւ պնդուեցաւ որ Կուսակալութիւնը Խորհուրդ տուած է Կարգադիր Յանձնախումբի կազմը չեղեալ համարել։ Կուսակալութիւնը այս պահանջը կը ներկայացնէ կարգ մը անդամներու դէմ առարկութիւն ունենալով։ Մինչ այդ Տեղապահ Պէքճեան յայտնած է թէ ինք ոեւէ դժգոհութիւն չէ ունեցած Կարգադիր Յանձնախումբէն։
Մերթ ընդ մերթ տարակարծութիւններու տեղի տուող ժողովի աւարտին ընդհանուր համոզում գոյացաւ Կուսակալութեան ուղղարկուած նամակին պատասխանը սպասելու մասին։
Ընդունուած կարգի համաձայն իշխանութիւնները պէտք է երկու ամսուայ ընթացքին դրական կամ ժխտական կերպով պատասխանեն իրենց ուղղուած դիմումին։ Այդ ժամկէտը կը լրանայ Հոկտեմբեր ամսուայ սկիզբին։ Եթէ տուեալ ժամանակի ընթացքին պատասխան մը ստացուած չէ այն ատեն որոշուեցաւ ժամադրութիւն մը պահանջելով անձամբ ներկայանալ Իսթանպուլի Կուսակալութեան, որպէսզի ճշդուի թէ այդ ինչն է Կարգադիր Յանձնախումբի դէմ ցուցաբերուած վերապահութիւնը։ Վերջապէս չէ յստակացած թէ Կուսակալութիւնը ինչ պատճառաւ դժգոհ է կազմուած յանձնախումբէն։
Ժողովէ ետք Տեղապահ Պէքճեան Սրբազանի խորհրդատուներէն իրաւաբան Սեպուհ Ասլանկիլ «Ակօս»ին փոխանցեց հետեւեալ բացատրութիւնները՝ «ժողովը բաւական լարուած պայմաններու մէջ կայացաւ։ Տեղապահ Սրբազանը բացայայտ կերպով կոչ ըրաւ դժգոհութիւնները հրապարակելու մասին։ Կարգադիր Յանձնախումբը պետութեան մօտ դիմում մը կատարած է։ Այդ դիմումը ժամկէտ մը ունի եւ հիմա պէտք է այդ ժամկէտի լրանալը սպասել։ Նախաձեռնարկ Մարմինը օրինական կազմութիւն մըն է։ Ոչ ոք պէտք է առարկութիւն մը ունենայ այդ կազմին հանդէպ։ Եթէ պետութիւնը յանձնախումբի դիմումին պատասխան մը չի տայ այս վիճակը մերժում կը համարուի։ Այն ատեն ալ յանձնախումբը որոշ այլընտրանքներ ունի իր առջեւ։ Կրնայ կատարուածին դէմ դատարան դիմել, կամ այլ միջոցներու ձեռնարկել։ Այս բոլորը պէտք է հանգրուան առ հանգրուան քննարկել եւ այդ քննարկումին համապատասխան կերպով շարժիլ»։
Ասլանկիլ այս տեսակի շշուկներուն տարածման փուլին մասին հարցումին ալ պատասխանեց հետեւեալ կերպով «միթէ՞ պետութիւնը խօսակից չունի որ բարեկամներու միջնորդութեամբ իր կամքը պիտի յայտնէ։ Մենք պաշտօնական պատասխան մը չենք ստացած։ Պիտի սպասենք այդ պատասխանը։ Պետութիւնը իր դիրքորոշումը պէտք է պաշտօնական գրութիւնով ներկայացնէ։ Եթէ պետութիւնը առարկութիւն մը ունի կը պատշաճի որ պաշտօնապէս ներկայացնէ իր այս առարկութիւնը։ Շիրինօղլուն ալ նշեց թէ անհամ ժողով մըն էր որ կայացաւ։ «Ոմանք համարձակեցան պետութեան դէմ գլուխ բռնելու։ այդպէս բան ընդունելի չէ։ Տեղապահը յայտնեց թէ ինք գոհ է Կարգադիր Յանձնախումբի աշխատութենէն եւ բնաւ մտադիր չէ այդ խումբը լուծելու։ Անշուշտ յարգանք կը զգանք իր որոշումին հանդէպ։ Այժմէն չեմ կրնար կանխատեսել թէ ապագայի օրերը ինչ կը խոստանայ։ 30 Օգոստոսի Յաղթանակի Տօնին առթիւ կատարուած տօնակատարութեան մեր զանցառումը իմաստալից է։ Այդտեղ պարտինք Պետութեան Պատգամը տեսնել։ Պետութիւնը այսպէսով պատգամ մը փոխանցած եղաւ։»։
Ապա Շիրինօղլու դառնութիւն յայտնեց ժողովականներէն մէկուն իրեն ուղղած քննադատութեան համար։ Ըսաւ որ ինք միշտ աշխատած է հասարակութեան ի նպաստ եւ այժմ այդ աշխատութիւնն է որ կ՚անտեսուի, կ՚արհամարհուի ոմանց կողմէ։ «Աւելի քան 35 տարիէ անշահախնդիր կերպով կը ծառայեմ իմ ազգին» ըսաւ Պետրոս Շիրինօղլու։
