Խորհրդարանի հայազգի պատգամաւոր Կարօ Փայլան Ներքին գործոց նախարար Սիւլէյման Սոյլույի ուղղեալ հարց-դիմում մը կատարած է Խորհրդարանի մէջ։
Փայլան իր դիմումին մէջ նիւթ կ՚ունենայ Իսթանպուլ Պալմումճու թաղի մէջ յայտնուած վերտառութիւն մը, որուն վրայ գրուած էր՝ «Հրեայ ծագումով Պարզանի։ Մենք գիտենք քու ով ըլլալդ եւ նպատակիդ ալ ո՛չ թէ Քիւրտիստանի, այլ Մեծն Իսրայէլի ծառայել ըլլալը։ Գիշեր մը յանկարծ պիտի գանք»։
Փայլան այս առթիւ նախարարին յիշեցուց թէ նախապէս բազում անգամներ յարձակումի ենթարկուած հրէից Նեւէ Շալոմ տաճարի առջեւ երկու ամիս առաջ «Ալփերէն Օճախներ» կոչեալ ազգայնական խմբակը յարձակումներ կատարած էր։ «Այս մասին 15 Օգոստոս 2017-ին Վարչապետ Պինալի Եըլտըրըմի հարցում մը ուղղելով գիտնալ ուզած էինք թէ յարձակողներու դէմ, որեւէ հարցաքննութիւն կատարուած է, թէ ոչ։ Ինչո՞ւ համար չէ կանխուած յարձակումը եւ ատելութեան յանցանքներու դէմ ի՞նչ տեսակ կանխամիջոցներ կը ձեռնարկէք»։
Փայլան յիշեցուց, որ իրենց այս հարց-դիմումին պատասխան չեն ստացած։ Իսկ հիմա երեսփոխանը Ներքին գործոց նախարարին կ՚ուղղէ հետեւեալ հարցումները՝
• Տասնեակներով տեսախցիկներու առկայութեամբ Հրէից դէմ ատելութեան պատգամներ պարունակող այս վերտառութիւնը կախողներու ինքնութիւնը ստուգուա՞ծ է։
• Վերտառութիւնը կախողներու մասին հարցաքննութիւն կատարուա՞ծ է։
• 20 Յունիս 2017-ին Նեւէ Շալոմ տաճարին յարձակողները դատարան յանձնուա՞ծ են։
• Եթէ երկու ամսուայ ընթացքին հարցաքննութիւն չէ կատարուած, պատճառը ի՞նչ է։
• Հրէից դէմ կրկնուելով գործուած այս ու նման հակասեմական ատելութեան յանցանքներու անպատժելիութիւնը կը քաջալերէ նոր յանցագործութիւնները, համաձա՞յն էք։
• Ատելութեան յանցանքներու դէմ նախարարութենդ անձնակազմը յատուկ դաստիարակութեան կ՚ենթարկուի՞ն։