Նոր սերունդի աշխոյժ գործիչներու փաղանգին կը պատկանի լուսանկարիչ Մուրատ Էզեր, որ վերջին տարիներուն կարեւոր ծառայութիւն բերած է քաղաքիս գրեթէ բոլոր պարբերականներուն։ Մուրատ Էզեր ծնած է 1965 թուականին Պաթմանի Պեշիրի գաւառի Պարընչ գիւղի մէջ։ Ապա ընտանեօք տեղափոխուած են Պոլիս, ուր ստացած է իր նախնական ուսումը Գարակէօզեան որբանոցի մէջ։ Ան ապա յաճախած է Սուրբ Խաչ Դպրեվանք։ Հայ մամուլին իբրեւ լուսանկարիչ աշխատակցած տարիներուն ունեցած է նաեւ զանազաններու դիմանկարներ, որոնցմով կազմած է իր ցուցահանդէսը։ Իրականութեան մէջ լուսանկարիչի աշխատանքի առումով ամենահաճելի ձեռքբերումն է այս, քանի որ նման հաւաքածոն կը գոյանայ բնական կուտակումի մը հետեւանքով եւ այդ կուտակումը տարիներու հոլովոյթի մէջ կը պատրաստէ ինքնին արժէք ներկայացնող հարստութիւն։
Մուրատ Էզեր ահա այդ սեփական հարստութեան բաժնեկից կ՚ընէ մեզ իր գործերը ներկայացնելով Պաքըրգիւղի նորակառոյց Տատեան Վարժարանի Մոնիք- Արէտ Երկանեան սրահին մէջ։ Ցուցահանդէսի բացումը տեղի պիտի ունենայ 2 Մարտ Ուրբաթ ժամը 19.00-ին եւ պիտի շարունակուի մինչեւ 4 Մարտ թուականը։ Այս նախաձեռնութեան առթիւ կանխաւ կը շնորհաւորենք խոստումնալից լուսանկարիչը եւ յաջողութիւններ կը մաղթենք իր աշխատութիւններուն մէջ։
