Վերջերս Հոլլանտայի մէջ տեղի կ՚ունենայ քաղաքացիական անհնազանդութեան խիստ ուշագրաւ երեւոյթ մը։ Հոլլանտա ապաստանած հայ ընտանիքի մը երկրէն վտարուելուն արգելք ըլլալու համար տեղւոյն բողոքական եկեղեցին դիմած է շատ հետաքրքրական կանխամիջոցի։ Լահէյ քաղաքի բողոքականներու Պեթել եկեղեցին իր դռները բացած է հայ գաղթականներուն եւ ոստիկանութեան եկեղեցի մտնելուն արգելք ըլլալու համար ալ շարունակական կերպով պատարագ կը մատուցէ։ Հոլլանտական օրէնքներու համաձայն ոստիկանները իրաւունք չունին հոգեւոր արարողութեան ընթացքին եկեղեցի մտնելու։ Օրէնքի այս զանցառութիւնը առիթ մը դարձած է աւելի քան 300 հոգեւորականներու համար, որոնք որոշ հերթափոխութեամբ առանց դադրեցնելով կը շարունակեն պատարագը։ Արարողութեան խորհրդանշանը մոմավառութիւնն է եւ անոնք վառ մոմը մէկս միւսի փոխանցելով կ՚ապահովեն որոշ հերթափոխութիւն։ Հինգ անձերէ բաղկացող Թամրազեան ընտանիքը իրենց հօր քաղաքական պատճառներով սպառնալիքներու թիրախ ըլլալէ ետք լքած էին Հայաստանը եւ ապաստանած Հոլլանտա։ Սակայն ինը տարիներ շարունակուող իրաւական գործընթացի աւարտին Հոլլանտայի իշխանութիւնները մերժեցին Թամրազեան ընտանիքի ապաստանելու խնդրանքը եւ որոշեցինք զիրենք երկրէն դուրս վտարել։
Նշենք, որ բացի հոգեւորականներու զօրակցութենէն եկեղեցւոյ հաւատացեալներն ալ ձայնակցած են այս արշաւին եւ եկեղեցին ընդմիշտ լեցուն է ժողովուրդով։
Թերթը տպագրութեան ուղարկուած ժամերուն տակաւին կարելի չէր եղած ստուգել, թէ տեղւոյն հայ հոգեւորականները ինչպէ՞ս արձագանգած են այս գործընթացին եւ այդ զօրակցութեան հերթափոխութեան մասնակցողներուն մէջ արդեօք կա՞ն հայ հոգեւորականներ։ Սակայն այնպէս, թէ այսպէս նիւթը արդէն գտած է իր արժանի արձագանգը, որուն կը ձգտէին արդէն այս ուրոյն միջոցառման նախաձեռնողները։
