Ներման Միջազգային Կազմակերպութիւնը (ՆՄԿ) ստորագրահաւաք ձեռնարկած է Իսթանպուլի Սաուտի Արաբական հիւպատոսարանի գտնուած փողոցը լրագրող Ատնան Քաշըքճըի անունով վերակոչելու համար։ Այս մասին դիմում կատարուած է Պեշիքթաշի քաղաքապետարանին։
Մեկնարկող արշաւին մասին բացատրութիւններ փոխանցեց ՆՄԿ-ի Թուրքիոյ ռազմավարութիւններու եւ ուսումնասիրութիւններու վարիչ Էնտրիու Կերտնըր։ «Պէտք չէ որ անպատժելի մնայ Ճեմալ Քաշըքճըի սպանութիւնը։ Արար աշխարհ տեսաւ թէ Սաուտական թագաւորութիւնը ինչպէս կը ճնշէ խօսքի ազատութիւնը եւ որքան անխիղճ կրնայ ըլլալ։ Այս վայրագութեան մորացուելուն արգելք ըլլալու համար դիմեցինք Պեշիքթաշի եւ Իսթանպուլի քաղաքապետարաններուն, հիւպատոսարանի գտնուած «Աքասյալը» փողոցը «Ատնան Գաշըքճը փողոց» ըլլալով փոխելու պահանջով» ըսաւ Կերտնըր։
ՄՆԿ-ի թուրքիոյ գրասենեակը եւ «Լրագրողներ առանց սահմանի» շարժումը Քաշըքճըյի անյայտ կորելուն 100-րդ օրը մամլոյ յայտարարութիւն մը ընելու համար մէկտեղուեցան Սաուտական հիւպատոսարանի առաջ եւ պահանջեցին թէ ՄԱԿ-ի կողմէ միջազգային եւ անկախ հարցաքննութիւն մը կատարուի։ Ապա խորհրդանշական կերպով զետեղեցին «Ճեմալ Քաշըքճը փողոց» գրուած ցուցատախտակը։
Լրագրող Ճեմալ Քաշըքճը ամուսնութեան թղթաբանութիւններու համար 2 Հոկտեմբեր 2018-ին այցելած էր հիւպատոսարան եւ իրմէ անգամ մըն ալ լուր չէր առնուած։ Թուրքիոյ իշխանութիւններու կատարած հարցաքննութենէ ետք համոզում գոյացաւ թէ Քաշըքճը սպաննուած է հիւպատոսարանի մէջ, ապա մարմինը բաժանուած եւ դուրս հանուած։
Ան աշխատակցած էր «Օքազ» եւ «Սաուտի կազեթթա» թերթերուն, որոնք արաբերէն եւ անգլերէն կը հրատարակուին։ Միջոց մը աւագ խմբագիրի պաշտօն ստանձնեց «Ալ Վաթան» օրաթերթի մէջ։ Սաուտական իշխանութիւնները հրապարակաւ մեղադրած էին զինք, 2016-ին Ուաշինկթընի մէջ միջոցառման մը ընթացքին Թրամբը քննադատած ըլլալուն համար։ Քաշըքճը 2017-ին Սաուտական Արաբիայէն հեռանալով հաստատուեցաւ ԱՄՆ, ուր իբրեւ սիւնակագիր կ՚աշխատակցէր «Ուաշինկթըն Փոսթ» թերթին։
