Կրկին անգամ փոխուած է Պաքըրգիւղի հայկական դպրոցի փողոցին անունը։ Ինչպէս պիտի յիշուի, Պաքըրգիւղի քաղաքապետարանի որոշումով փողոցը կոչուած էր հայ բարերար Տատեանի անունով։ Սակայն Իսթանպուլի քաղաքապետարանը մերժած էր տեղւոյն քաղաքապետարանի որոշումը եւ վերցուցած էր «Տատեան փողոց» գրուած ցուցատախտակը, զայն վերածելով «Մապետ» (Աղօթատեղի) փողոցի։
Շրջանային քաղաքապետարանը 9 Դեկտեմբերի իր նիստին միաձայնութեամբ որոշում կայացուց Տատեան փողոց անունի շուրջ։ Այստեղ ուշագրաւ է, որ իշխող կուսակցութեան անդամներն ալ դրական արձագանգած են եւ որոշումը կայացած է քաղաքապետական խորհուրդի միաձայնութեամբ։ 5 Փետրուար երեքշաբթի օր Պաքըրգիւղի քաղաքապետ Պիւլենթ Քերիմօղլու արարողութեան կարգով կրկին անգամ զետեղեց «Տատեան փողոց» գրուած ցուցատախտակը։ Այս առթիւ քաղաքապետը յիշեց, որ Յովհաննէս Պէյ Տատեան շատ կարեւոր ծառայութիւններ բերած է Օսմանեան պետութեան եւ հիմնած է վառօդարանը, երկաթի եւ հիւսուածքի գործարաններ։
«Պաքըրգիւղաբնակ մեր ժողովուրդի ցանկութիւնով եւ քաղաքապետարան խորհուրդի միաձայն որոշումով Մապետ փողոց անունը կը փոխենք Տատեան փողոց ըլլալով։ Այս առթիւ խորին շնորհակալութիւն կը յայտնեմ մեր խորհրդի բոլոր անդամներուն, անկախ իրենց պատկանած կուսակցութենէն։ Կը յուսամ, թէ մայր քաղաքապետարանն ալ կը յարգէ մեր այս կամքը եւ անգամ մը եւս չփորձէր Տատեան անունը ջնջելու մասին»։