12, 13 եւ 14 Մարտ թուականներուն պիտի շարունակուի Հրանդ Տինքի սպանութեան դատավարութիւնը։ 14-րդ Եղեռնադատ Ատեանի մէջ կայանալիք դատական նիստի ընթացքին պիտի շարունակուի վկաներու լսումները։ Ինչպէս ծանօթ է այս դատավարութեան շրջանակով կը դատուին 85 մեղադրեալներ, որոնցմէ հինգը բանտարկուած է։ Այս անգամ դատարանը պիտի լսէ Էօզճան Էօզքանը, որ նախապէս պնդած էր, թէ Եասին Հայալ Իսթանպուլ չէ եկած։ Մինչդեռ աւելի ետք կարգ մը ստուգումներով յայտնի դարձաւ, թէ ինք արդէն առհասարակ չէ գտնուած այն վայրերը, ուր հաւանական պիտի ըլլար Եասին Հայալի հանդիպիլ։
Դատարանը նախորդ տարուայ Դեկտեմբերին կայացած նիստերու ընթացքին ազատ արձակած էր նախկին զօրավարներէն Համզա Ճելեպօղլուն եւ Իսթանպուլի Ոստիկան զօրաց հրամանատարութեան կազմին Լրաքաղութեան բաժնի աշխատակից Եաւուզ Գարագայան։
Ինչպէս նախորդ նիստերուն, այս նիստին ալ իրենց վկայութիւնը բերելու հրաւիրուած են առհասարակ պետական պաշտօնեաներ, ըլլայ ոստիկան, կամ ըլլայ զինուոր։ Այս է պատճառը որ «Հրանդի ընկերները» հարթակը այս ոճիրի կապակցութեամբ ընդմիշտ կը վանկարկէ՝ «Ոճրագործ պետութիւնը հաշիւ պիտի տա՛յ» ըսելով։
