Հայաստանի հանրապետութեան եւ Թուրքիոյ միջեւ ցամաքային սահմանը փակ ըլլալով երկու երկիրներու ուղղակի հաղորդակցութեան միակ միջոցն էր օդային գիծը։ Այդ գիծը անխափան կերպով կը գործէ 1996 թուականէն այս կողմ, աւելի քան 23 տարիէ ի վեր։
Սկզբնական տարիներուն «Արմենիան Էիրլէյնս» ընկերութեան «Թուպոլեվ» ինքնաթիռներով կատարուած չարթրային թռիչքները կ՚իրականանային շաբաթը երկու օր փոխադարձաբար։ Հայաստանի ազգային օդային ընկերութեան սնանկացումէն ետք Երեւան- Իսթանպուլ թռիչքները ստանձնած էր «Արմաւիա» ընկերութիւնը։ «Աթլասկլոպալ» այս գիծի վրայ թռիչքներ կատարող թրքական ընկերութիւն էր, որ ուղեւորներու պահանջին համապատասխան կերպով շաբաթական թռիչքները բարձրացուցած էր հինգ օրուայ։
26 Նոյեմբեր երեքշաբթի օր ընկերութիւնը յայտարարեց, թէ ներքին եւ միջազգային բոլոր թռիչքները դադրեցուած է մինչեւ 21 Դեկտեմբեր։ Ընկերութիւնը այս որոշումը կը պայմանաւորէ տնտեսական ծանր լուծի հետ, յատկապէս շեշտելով Իսթանպուլի նորակառոյց օդակայանի պատճառած յաւելեալ ծախսերը։ «Աթլասկլոպալ ընկերութիւնը նոր օդակայանի պատճառած յաւելեալ ծախսերու բերմամբ չէ կրցած վերացնել 2016- 2017 տարեշրջանի տնտեսական ճգնաժամին եւ տարադրամի յանկարծակի սղաճին պատճառած վնասները։
Յանկարծակի այս որոշումը մեծ դժուարութիւն պատճառեց բազմաթիւ ուղեւորներու համար, որոնք իրենց ճամբորդութիւնը ծրագրած էին այս ընկերութեան միջոցաւ։ Այս պահուն այդ ճամբորդները պիտի սպասեն 16 Դեկտեմբեր թուականը, որմէ ետք կարելի պիտի ըլլայ ցարդ վճարուած տոմսակի փոխարժէքները ետ գանձեց։
«Աթլասկըլոպալ»ի թռիչքներու առկայացման որոշումէն ետք խզուած եղաւ Իսթանպուլ ու Երեւանի միջեւ ուղիղ ճամբորդելու միակ միջոցը։
