«Չեմ զիջեր սկզբունքներէս»
Արտասահմանի եպիսկոպոսներու թեկնածութիւնը արգիլելով անօրինական հանգամանք մը ստացած Թուրքիոյ 85-րդ պատրիարքի ընտրութեան գործընթացի դէմ երրորդ դատ մը եւս յարուցուեցաւ։ Այս դատի իրաւապաշտպանն է մօտ անցեալին Նախաձեռնարկ Մարմնի անդամութենէն եւ բամբերի պաշտօնէն հրաժարող փաստաբան Սարօ Պենկլիեան։ Պենկլիեան «Ակօս»ին յայտնեց թէ Վարչական Ատեանի մօտ բացուած դատի մեղադրեալը Ներքին Գործոց Նախարարութիւնը եւ հետեւաբար Իսթանպուլի Կուսակալութիւնն է։ «Իմ պաշտպանեալը այս քայլին դիմեց իրաւական հիմքէ զուրկ կամայական մերձեցումներով պարտադրուած արգելքներու դէմ գործընթացը կասեցնելու, եթէ այս մէկը չյաջողի ուշ կամ կանուխ կիրարկուածին անօրինութիւնը փաստելով Նախարարութեան ղրկած կանոնագրի չեղարկումը ապահովելու համար։ Իմ պաշտպանեալը այս դատով կ՚ուզէ գիտակից, բայց լուռ մնացած մեծամասնութեան ձայնը դառնալ։ Ձեւով մը կառուցուիլ ուզող վախի կայսրութեան դէմ միշտ նահանջող եւ այդպէսով յաջողած կարծող դրութեան դէմ պայքարելու միջոց մըն է այս դատը։ Յատկապէս կ՚ուզեմ նշել, թէ ոչ իմ պաշտպանեալը, ոչ ալ այս դատական գործընթացը որեւէ կողմի ծառայելու, որեւէ կողմի նպաստ պատճառելու նպատակ չունենար։ Ընդհակառակը այս դատի շրջանակով համայնքային որեւէ հաստատութիւն կամ անհատ մեղադրանքի չէ ենթարկուած։ Կ՚երաշխաւորեմ թէ գործընթացը մինչեւ վերջ պիտի ընդանայ այս սկզբունքներուն վրայ» ըսաւ իրաւաբան Սարօ Պենկլիեան։
Զարգացումներ Չեքեմի
դատին մէջ
Սուրբ Երրորդութիւն եկեղեցւոյ թաղական խորհուրդի անդամ Սիմոն Չեքեմ ալ նախապէս նման դատ մը բացած էր, որու շրջագծով դատարանը դիմեց Ներքին Գործոց Նախարարութեան տեսութիւններուն։ Նախարարութիւնը կարծիք յայտնելու համար յաւելեալ ժամկէտ պահանջեց։ Դատարանը նաեւ դիմեց պատրիարքի ընտրութեան Նախաձեռնարկ Մարմնին, ցարդ առնուած որոշումներու արձանագրութիւնը պահանջելով։
Սելինա Տողան՝
«Չեմ հրաժարիր»
Նախաձեռնարկ Մարմնի ութերորդ անդամի ալ հրաժարումէն ետք հանրային կարծիքի ուշադրութեան կիզակէտին է Հանրապետութեան կուսակցութեան նախկին պատգամաւոր Սելինա Տողան։
Տողան վերջերս զանազան շրջանակներէն իրեն հասնող հրաժարելու առաջարկներուն դէմ գրաւոր յայտարարութիւնով մը հանդէս եկաւ։ «Հրաժարումը անհատական որոշում մըն է, որ ենթական կը ճշդէ իր ներքին հաշուեյարդարին բերումով։ Այս պատճառաւ ալ չեմ մեղադրեր ոչ հրաժարողը, ոչ ալ հրաժարելէ խուսափողը։ Նաեւ այս խառնաշփոթ միջավայրին մէջ իմ անձնական պատուի համար մտահոգուող բարեկամներուն ալ շնորհակալութիւն կը յայտնեմ։ Սրտանց կը հաւատամ անոնց մտերմութեան։ Քաղաքական եւ կեանքի փորձառութեամբ, իրաւաբանի ինքնութեամբ, նոյնիսկ որ սահմանափակ ըլլայ կ՚ուզեմ ներդրում բերել։ Ճիշդ չեմ գտներ ընտրութեան հազիւ 17 օր մնացած ժամանակահատուածի մը մէջ հրաժարելու։ Չեմ առարկեր այն պնդումին թէ ծրագրուած բեմադրութեան մը մէջ մնացած ենք։ Նոյնիսկ ծրագրուած բեմադրութեան մը մէջ կը հաւատամ թէ ես ամենաճիշդը կրնամ ընել։ Յայտնի է իմ ցարդ ներկայացուցած առարկութիւնները, գործածած ձայները, պահանջած ճշդումները։ Արդար չէ տարիներու ընթացքին կուտակուած կեղտին, ճենճին, որպէս Նախաձեռնարկ Մարմնի անդամ իմ միջոցաւ մագրուիլը ակնկալել։ Սա պահուն փոխանակ հերոսներ ստեղծելու մեր բոլոր ուժը պէտք է ուղղենք պատրիարքական ընտրութեան գործընթացին մէջ թեկնածուներու սահմանումը կանխող արդար ու մնայուն կանոնագիր մը պատրաստելու գործին։ Մեզի համար պատրիարքի ընտրութեան համազօր կարեւոր է համայնքային հաստատութիւններու վարչութիւններուն ընտրութեան գործընթացը։ Նոյնիսկ անարդար, պարտաւոր ենք այս ընտրութեան գործընթացը ժողովրդավարական հասունութեամբ աւարտին հասցնելու»։