Պարիարքական ընտրութեան գործընթացի մէջ առաջին օրէն իսկ որպէս նիւթին ուղղակի շահախնդիր, բայց անպաշտօն եւ անկոչում մնացածներու ձայնը հանդիսացող Հասարակութեան Նախաձեռնութիւն շարժումը ընտրութեան ընդառաջ յայտարարութիւն մը հրատարակեց իր միտքը փոխանցելով հասարակութեան։ Նախքան այս յայտարարութիւնը Հասարակութեան Նախաձեռնութիւն շարժումը ժողով մը գումարեց Նախաձեռնարկ Մարմինի ցարդ հրաժարած անդամներուն հետ եւ լսեց անոնց հրաժարման տեղի տուող գործօնները։ Այսպէս 28 Նոյեմբերին կայացող ժողովին մասնակցեցան Ղուկաս Արզուման, Մինաս Ասլան, Սարօ Պենկլիեան, Սարգիս Չաւուշեան, Սեդրակ Տաւութհան, Կարպիս Տուրասլան, Գէորգ Էրքան եւ Նազարէդ Էօզսահակեան։ Անոնք բոլորն ալ մեծ ոգեւորութեամբ լծուած էին պատրիարքի ընտրութեան գործընթացը դասաւորելու պարտականութեան եւ սակայն շուտով անդրադարձած, որ կատարուածը արդէն նախապէս ծրագրուած գործողութեան մը բեմադրութիւնն է միայն։ Արդարեւ Ներքին Գործոց Նախարարութենէն սպասուած կանոնագրին հրապարակումէն անմիջապէս ետք կայացող առաջին ժողովին իսկ ըսուած էր, թէ այս գործընթացին մէջ անիմաստ է արդարութիւն փնտռել։ Սոյն արտայայտութիւնը արդէն պատճառ դարձաւ առաջին հրաժարականի։ Մնացողներ որոշ ժամանակ յուսացին թէ պիտի կրնան բարեփոխել այս սխալ ընթացքը։ Սակայն հետզհետէ յայտնի դարձաւ, որ բոլորը միասին գործիքը կը դառնան նախապէս ճշդուած ծրագրի մը գործադրման։ «Կարծես թէ արդէն իսկ եփած ճաշը կրկին փուռը կը դնէին, որպէսզի գոյանայ իբրեւ թէ նոր եփած ըլլալու տպաւորութիւն»։ Այս համոզումին յանգելէ ետք հրաժարականները իրար յաջորդեցին եւ Նախաձեռնարկ Մարմնի կազմը կէսով իսկ խուսափեցաւ նման ընթացքի մեղսակից ըլլալէ։
Այսօր Հասարակական Նախաձեռնութիւնը կը յայտարարէ, թէ չի քուէարկեր անարդար եւ իրաւունքները յափշտակող ընտրութեան մը համար։ Այս ըսելով հասարակութիւնն ալ կը հրաւիրէ իրենց ձայնին հետեւելու եւ արդարութեան կողմը ըլլալու։
