«Ակօս»ի նախորդ թիւով անդրադարձած էինք Պատրիարքարանի նախաձեռնութեամբ ծրագրուած նոր մարմինի մը ձեւաւորման նիւթին։ 18 Փետրուար երեքշաբթի երեկոյեան Պատրիարքարանի մէջ Սահակ Բ. պատրիարքի նախագահութեամբ կայացաւ տեղեկատուական հանդիպում մը, այս նոր նախաձեռնութեան մանրամասնութիւնները ծանօթացնելու նպատակով։
Եկեղեցիներու թաղական խորհուրդներու ատենապետերու մասնակցութեամբ կայացող ժողովին ներկայ գտնուեցան նաեւ Կրօնական ժողովի ատենապետը եւ այլ հոգեւորականներ։
Այսպէս քաղաքիս դպրոց ունեցող 13 համայնքային հաստատութեան վրայ աւելցաւ նաեւ Ս. Փրկիչ Հիւանդանոցի հոգաբարձութիւնը, Պէյքոզի, Կէտիկփաշայի եւ Գընալը Կղզիի թաղականութիւնները եւ 17 անդամներով կազմուած եղաւ Կեդրոնական սեղանը։
ՎԱՏԻՓ հարթակի լուծարկումէն ետք այս նոր փորձ մըն է համայնքային խնդիրները խորհրդակցութեան եւ համագործակցութեան պայմաններու մէջ լուծումի բերելու համար։ Այս մասին պահանջը երկար տարիներ առաջ օրակարգի բերողը եղած էր թերթիս հիմնադիր Հրանդ Տինք։ Այդ շրջանին Տինք առաջարկած էր համայնքային հաստատութիւններու եկամուտը հաւաքել միացեալ ցանցի մը մէջ (ortak havuz), ուրկէ բոլոր հաստատութիւնները պիտի օգտուէին իրենց կարիքներուն համապատասխան ձեւով։ Սակայն ամէն մէկը ինքնին իշխանութեան մը վերածուած հաստատութիւնները խստիւ մերժեցին այս կամքը։ Ներկայ պայմաններու տակ առաջնահերթ խնդիր մըն է համայնքային հաստատութիւններու վարչութիւններու ընտրութեան նիւթը։ Ներքին գործոց նախարարութիւնը պատրիարքական ընտրութեան ընդառաջ խոստացած էր այս հարցին ալ շուտափոյթ լուծումը։ Իսկ հասարակութեան մօտ ընկերային խնդիրներու նկատմամբ հետաքրքրութիւնը արդեօք պիտի կրնա՞յ կայանալիք այդ նոր ընտրութիւններու միջոցաւ սերնդափոխութիւն մը, աւելի կարեւորը գաղափարի փոփոխութիւն մը ապահովել, թէ ոչ։
Մրցակցութենէ հեռու կայացող ընտրութիւնները, որքան ալ պահպանողական շրջանակներու կողմէ ներկայացուին «համերաշխութիւն» իրականութեան մէջ ընկերային նեխածութեան մը ապացոյցն են եւ ոչ աւելին։
Իսկապէս ծանր օրակարգ մը կայ նորընտիր պատրիարքին առջեւ։ Հազիւ որոշ կենսունակութիւն ապահովելով է, որ պիտի կրնայ գոյացնել իրեն զօրակցող հասարակութիւն մը, թէ ոչ հին շարքերը պիտի շարունակեն իրենց եսակեդրոն վարքը, որ երբեք ճար չի դառնար հասարակական խնդիրներուն։
