15 Յունիս երկուշաբթի առաւօտուայ առաջին ժամերուն Թուրքիոյ զինեալ ուժերուն պատկանող կործանիչ ինքնաթիռներ հարուածեցին Հիւսիսային Ըրաքի քրտական ինքնավար մարզի որոշ թիրախները։ Այսպէս էզտիներով բնակեցուած Շենկալ լեռը, Մահմուրի գաղթականաց ճամբարը եւ Քանտիլ լեռը 40 վայրկեան տեւողութեամբ ռմբակոծուեցան կործանիչներու կողմէ։ Տեղական շրջանակներէ ստացուած լուռերուն համաձայն մահացողներ չեն եղած, բայց արձանագրուած են վիրաւորուած խաղաղ բնակիչներ։
Պաշտպանութեան Նախարարութիւնը անդրսահմանեան յարձակումը բնութագրեց ահաբեկչութեան դէմ պայքարի կաղապարով։
Ռմբակոծումէն երկու օր ետք այս անգամ ուղղաթիռներ զինուոր փոխադրեցին նախապէս ռմբակոծուած տարածքներուն, որոնց մասին թերթս հրատարակուելու պատրաստուած ժամերուն տակաւին յստակ տեղեկութիւններ չէին փոխանցուած։
Ըրաքի կառավարութիւնը Թուրքիոյ Պաղտատի դեսպանին փոխանցեց այս նիւթի նկատմամբ իր ցասումը վերջնագրի մը միջոցաւ։
Միւս կողմէ Եւրոպական կարգ մը քաղաքներու մէջ քիւրտ ցուցարարներ բողոքի ցոյցեր կազմակերպեցին եւ քննադատեցին այս տեսակ յարձակումներու հանդէպ անհաղորդ մնացած միջազգային հասարակութիւնը։
Նշենք որ վերջերս Թուրքիա Լիպիոյ մէջ ստանձնած դերակատարութիւնով ալ լրջօրէն կը քննադատուի գլխաւորութեամբ Ֆրանսայի կարգ մը երկիրներու կողմէ։