Յունաց Տիեզերական Պատրիարք Բարթողոմէոս Սրբազան առաջին անգամ միջամուխ եղաւ Սուրբ Սոֆիա տաճարի մզկիթի վերածուելու մասին պահանջներու նիւթին։ Ֆերիգիւղի Սրբոց Առաքելոց Յունաց Եկեղեցւոյ մէջ ելոյթ ունեցող Տիեզերական Պատրիարքը յայտնեց որ նման քայլ մը ցասում պիտի պատճառէ միլիոնաւոր քրիստոնեաներու մօտ։
Բարթողոմէոս սրբազանի քարոզը անգլերէն տարբերակով տեղադրուած է նաեւ Պատրիարքարանի դիմատետրի էջին վրայ։ Պատրիարք սրբազանը յայտնեց թէ 2016 թուին Թուրքիոյ Կրօնից Տեսուչ Մեհմետ Կէօրմեզին նամակ մը գրած ու յայտնած է Սուրբ Սոֆիա տաճարի իրավիճակը փոխելու մասին իր մտահոգութիւնները։ Այդ նամակին մէջ նշած է թէ այս սրբազան տաճարը, թէ իսլամներու եւ թէ քրիստոնեաներու համար արժէք մը կը ներկայացնէ, քանի որ հոն 900 տարի երկրպագած են քրիստոնեաներ եւ 500 տարի ալ իսլամադաւաններ։ Տաճարը իր այս յատկութիւնը լաւագոյն կերպով կը ցոլացնէ թանգարանի մը կերպարին մէջ։ Այդ տարակարծութիւններու ընթացքին լրագրողի մը երիտասարդներուն հետզհետէ մշակոյթի եւ արուեստի թեքումը յիշեցնելուն դէմ Բարթողոմէոս սրբազան հարց կու տայ. «Երիտասարդութեան այս շրջումը բոլորիս համար մտահոգիչ չէ՞ արդեօք»։ «Սուրբ Սոֆիայի մզկիթի վերածուիլը համայն աշխարհի վրայ միլիոնաւոր քրիստոնեաներու ցասում պիտի պատճառէ։ Այս տաճարը արեւելքի եւ արեւմուտքի իրար հանդիպման կարեւոր մէկ խորհրդանշանն է եւ այդ իմաստը նման որոշումով ծանրօրէն պիտի վիրաւորուի։ Համաշխարհային մարդկութիւնը, որ այս օրերուս արդէն կը ցնցուի մահաբեր համավարակի մը պայմաններուն տակ ալ աւելի կարիք ունի միութեան եւ հասարակական նպատակներու հետապնդման։ Մզկիթի վերածելու որոշումը այս առումով ալ ժխտական հետեւանքներ պիտի ունենայ»։
