Աւստրիոյ Սանտ Փէօլթըն քաղաքին մէջ մեկնարկեց եպիսկոպոսաց հաւաքը
Փետրուարի 17-ին Աւստրիոյ Սանտ Փէօլթըն քաղաքի մէջ մեկնարկեց եպիսկոպոսաց հաւաքը, որուն կը մասնակցէին Հայաստանեայց Առաքելական Սուրբ Եկեղեցւոյ Ամենայն Հայոց Կաթողիկոսութեան 25 արքեպիսկոպոսներ եւ եպիսկոպոսներ, այդ թուին մաս կը կազմէին` Երուսաղէմի եւ Պոլսոյ Հայոց Պատրիարքութենէն հոգեւորականներ։ Թուրքիոյ Հայոց Պատրիարքարանը կը ներկայացնէր Արամ Արք. Աթէշեան։ Ժողովականներու կարգին էր նաեւ Էջմիածնի Վատիկանի ներկայացուցիչ Խաժակ Արք. Պարսամեան։
17 Փետրուար առաւօտուայ ժամերուն ժողովականները մասնակցեցան Արեւագալի ժամերգութեան։ Հոգեւոր խորհրդածութիւններէ եւ աղօթական առանձնացումէն ետք յետմիջօրէին մեկնարկեց հաւաքը։
Եպիսկոպոսաց հաւաքը բացուեցաւ «Տէրունական Աղօթք»ով, որուն յաջորդեց միասնութեան մասին Պօղոս Առաքեալի՝ Եփեսացիներուն ուղղուած նամակէն ընթերցումը։ Ապա ժողովականներուն հայրական իր խօսքը ու պատգամը առցանց յղեց Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսը։
Այնուհետեւ մասնակիցներուն իրենց ուղերձը յղեցին նաեւ Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսը, Երուսաղէմի Պատրիարք Տ. Նուրհան Մանուկեանը եւ Պոլսոյ Պատրիարք Տ. Սահակ Մաշալեանը։
Օրակարգի քննարկումէն եւ հաստատումէն ետք ընտրուեցաւ դիւանը՝ վարելու համար Եպիսկոպոսաց հաւաքի հետագայ աշխատանքները։
Նոյն օր Սանտ Փէօլթընի Մայր Տաճարին եպիսկոպոսաց մասնակցութեամբ տեղի ունեցաւ Երեկոյան ժամերգութիւն, որու առիթով անոնց իր ողջոյնի խօսքը յղեց Կաթոլիկ Եկեղեցւոյ Սանտ Փէօլթընի թեմի առաջնորդ Գերաշնորհ Ալոիս եպիսկոպոս Շուարցը։
Տրուած ըլլալով որ Գարեգին Բ. Կաթողիկոս օրինական արգելքներու բերմամբ չի կրնար գլխաւորել եպիսկոպոսաց հաւաքը, հանդիպումը պիտի ունենայ լոկ խորհրդակցական բնոյթ եւ չի պիտի կրնայ որոշումներ կայացնել։
