Տիյարպեքիրի Ուսման եւ Բարեփոխման նախաձեռնութիւնը (DİERG) յատուկ դիմում կատարեց Թուրքիոյ Կրթական Նախարարութեան, Նեւրոզը դպրոցներէ ներս պաշտօնապէս յիշատակելու համար։
Նախաձեռնութեան դիմումին մէջ կը նշուի թէ Թուրքիոյ մէջ Նեւրուզ, Պարսկաստանի տարածքին Նաւրուզ եւ քիւրտ հասարակութեան մօտ Նեւուրօզ անուանումով ծանօթ գարնանամուտ խորհրդանշող տօնը ամբողջ տարածաշրջանի մէջ կը յիշուի մեծ ոգեւորութեամբ։
«15 կամ 20 վայրկեան տեւողութեան ծրագրով մը կարելի է այս տօնի իմաստն ու խորհուրդը փոխանցել ուսանողներուն։ Այսպէսով հասարակութեան մէջ յատուկ գիտակցութիւն կրնայ յառաջանալ միմեանց մշակոյթին հանդէպ» ըսուած է Նախարարութեան ուղղուած դիմումնագրին մէջ։
