Ն.Ա.Տ. Սահակ Բ. Պատրիարք Հօր հայրը՝ Յակոբճան Մաշալը 16 Հոկտեմբեր 2025, Հինգշաբթի, ժամը 13.00-ին Ս. Աստուածածին Աթոռանիստ Մայր Եկեղեցւոյ մէջ կատարուած արարողութեամբ յաւիտենականութեան յուղարկուեցաւ։
Որպէս սգակիր ներկայ էր Ամեն. Ս. Պատրիարք Հայրը, որու քով էին Կրետէի Հոգեւոր Տեսուչ Գերշ. Տ. Եզնիկ Արքեպս. Պետրոսեան եւ Գերշ. Տ. Արամ Արքեպս. Աթէշեան։
Յուղարկաւորութեան կարգին հանդիսապետեց Հոգշ. Տ. Շնորհք Վրդ. Տօնիկեան։ Ներկայ էին Աթոռոյս վեղարաւոր հայրերն ու քահանայից դասը։ Դասուն մէջ էին նաեւ յանուն Ն.Ս.Տ.Տ. Պարթոլոմէոս Ծայրագոյն Պատրիարքի՝ Ստեփանոս Մետրոպոլիտ, Ասորի Ուղղափառ Պատրիարքական Փոխանորդ Մոր Ֆիլիւքսինոս Եուսուֆ Չէթին Մետրոպոլիտ, Լատին Կաթոլիկ Եկեղեցւոյ Իսթանպուլի վիճակաւոր Մոնս. Մասսիմիլիանօ Փալինուրօ Եպս., Քաղդէական Պատրիարքական Փոխանորդ Սապրի Անար Արքեպս., Թուրքիոյ Հայ Կաթողիկէ համայնքի Պատրիարքական կառավարիչ Գերյ. Հ. Վարդան Թ. Ծ. Վրդ. Գազանճեան, Ասորի Կաթոլիկ Պատրիարքական Փոխանորդ Մոնս. Օրհան Չանլը Քորեպս., Մխիթարեան Միաբանութեան հայրեր՝ Գերյ. Հ. Սարգիս Ծ. Վրդ. Էրմէն եւ Գերյ. Հ. Յակոբոս Ծ. Վրդ. Չօփուրեան, Հայ Աւետարանական Եկեղեցւոյ հովիւ Վերապատուելի Գրիգոր Աղապալօղլու, Թուրքիոյ Բողոքական Եկեղեցիներու Միութեան անունով Պատուելի Պետրի Փէքէր, յանուն Թուրքիոյ Հրէից Խախամապետ Ռավ Տաւիտ Սեվիի՝ դիւանապետ Եուսուֆ Ալթունթաշ:
Աշխարհական դասէն ներկայ եղան Իսթանպուլի Փոխ Կուսակալ Մուսթաֆա Քայա եւ Իսթանպուլի Աւագ Քաղաքապետի Փոխանորդ Նուրի Ասլան:
Դամբանախօսեց հանդիսապետ Հայր Սուրբը «Զի զէն զինուորութեան մերոյ ոչ է մարմնաւոր, այլ զօրաւոր յԱստուծոյ առ ի քակելոյ զամուրս» (Քանի որ պատերազմելու մեր զէնքը մարմնաւոր չէ, այլ զօրաւոր՝ Աստուծոյ կողմէ, քակելու համար ամրութիւնները) (Բ. Կորնթ. 10.4) բնաբանով:
Ապա յանուն Մաշալը ընտանիքին՝ Պատրիարքական Փոխանորդ Արժ. Տ. Գրիգոր Ա. Քհնյ. Տամատեան խորին շնորհակալութիւն յայտնեց պետական աւագանիին, պետական հաստատութեանց, քոյր համայնքներու պետերուն ու ներկայացուցիչներուն, համայնքային հաստատութեանց, խնամակալութեանց եւ թաղային խորհուրդներուն, որոնք անձամբ ներկայ ըլլալով, հեռախօսով կամ գրութեամբ ցաւակցեցան Նորին Ամենապատուութեան հօր՝ Յակոբճան Մաշալըի մահուան եւ յուղարկաւորութեան առթիւ:
Իսկ Հոգշ. Տ. Եղիշէ Վրդ. Ուչքունեան կարդաց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի, Հոգշ. Տ. Գասպար Աբղ. Կարապետեան՝ Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսի եւ Հոգշ. Տ. Յարութիւն Վրդ. Տամատեան՝ Ն.Ա.Տ. Նուրհան Երուսաղէմի Հայոց Պատրիարքի ցաւակցական գրութիւնը:
Ապա հանգուցեալ Յակոբճան Մաշալըի մարմինը փոխադրուեցաւ Պալըքլըի Ազգ. Գերեզմանատունը: Թաղման կարգին հանդիսապետեց Գերշ. Տ. Արամ Արքեպս. Աթէշեան: Ներկայ էր հոգեւորականաց դասը: Հանգուցեալ Յակոբճան Մաշալըի մարմինը աղօթքներով ու շարականներով ամփոփուեցաւ ընտանեկան դամբարանին մէջ։
Հուսկ՝ Յարութիւն Ամիրա Պէզճեան սրահին մէջ կատարուեցաւ տան կարգ, ապա հոգեճաշ տրուեցաւ:
Բաց աստի, մեր Հոգեւոր Պետին հետ հեռաձայնային կապ հաստատեցին Թուրքիոյ Հանրապետութեան Նախագահ Վսեմ. Ռեճեփ Թայյիպ Էրտօղան եւ Թուրքիոյ Կրօնից Տեսուչ Փրօֆ. Տքթ Սաֆի Արփակուշ, որոնք ցաւակցութիւն յայտնեցին Նորին Ամենապատուութեան հօր՝ Յակոբճան Մաշալըի մահուան առթիւ:
