Գինեձօն՝ «Զահրատ-100, հատընտիր» հատորի
Պոլսահայ հանրածանօթ բանաստեղծ Զահրատի ծննդեան հարիւրամեակին առթիւ Պատրիարքական Աթոռի եւ Երեւան՝ Եղիշէ Չարենցի անուան գրականութեան ու արուեստի թանգարանի համագործակցութեամբ հրատարակուած «Զահրատ-100, հատընտիր» անուն գիրքի շնորհանդէսը 18 Նոյեմբերին Ֆերիգիւղի Եկեղցւոյ՝ Նազար Շիրինօղլու սրահի մէջ կայացած շնորհանդէսը, 19 Նոյեմբեր 2024, Երեքշաբթի, կրկնուեցաւ Պաքըրգիւղի Տատեան Վարժարանի սրահը:
Ն.Ա.Տ. Սահակ Բ. Պատրիարք Հայրը նախագահեց հանդիսութեան: Նոյն առթիւ Երեւանէն ժամանած էին գրող, ազգային գործիչ, Նիւ Եորքի գիտութիւններու ակադեմիայի պատուաւոր անդամ Տքթ. Յակոբ Այնթապլեան, Եղիշէ Չարենցի անուան գրականութեան եւ արուեստի թանգարանի տնօրէն Սիւզաննա Խոճամիրեան, Լուիզա Երեմեան եւ Վահագն Զաքարեան:
Հանդիսութեան մասնակցեցան համայնքային վարժարաններու աւելի քան 200 սաներ, իրենց ուսուցիչներուն հետ:
Տատեան Վարժարանի սաները ներկայացուցին Զահրատի «Շոգենաւային սպասարկութիւն» բանաստեղծութիւնը։
Ապա Վարժարանի տնօրէնուհի Երանուհի Պալճը հանդէս եկաւ բարի գալստեան խօսքով։
Օրուան հանդիսավարն էր Դալար Պաղտասարեան:
Ինչպէս նախորդ իրիկուն, այս անգամ եւս հանդիսութեան ընթացքին համայնքային լիսէներու սաներ Զահրատէն արտասանեցին:
Ապա հանդիսավարը կարդաց Զահրատի հակիրճ կենսագրականը:
Այս ելոյթէն ետք Պատրիարքական Աթոռոյ Հրատարակչական եւ Տեղեկատուական բաժանմունքներու տեսուչ Հոգշ. Տ. Յովակիմ Վրդ. Սերովբեան պատմեց նորատիպ հատընտիրի ոդիսականը եւ յիշեցուց, որ Զահրատ այլեւս դարձած էր ամբողջ ազգին ու մարդկութեան հասարակական արժէքը:
Սրտի խօսքով բեմ եկաւ հատորի գաղափարը յղացող ու մեկենաս Տքթ. Յակոբ Այնթապլեան, որ իր ուրախութիւնը յայտնեց սոյն հրատարակութեան յաջողութեան առթիւ, ապա վեր առաւ Պոլսահայ գրականութեան եւ Զահրատի ու անոր բանաստեղծութիւնները։ Ուսանողներուն խրատեց սիրել մայրենին։
Եղիշէ Չարենցի անուան գրականութեան եւ արուեստի թանգարանի տնօրէն Սիւզաննա Խոճամիրեան, որ ըսաւ թէ կու գայ Զահրատի հոգեւոր տունէն, քանի Զահրատի արխիւը կը գտնուի Գրականութեան եւ արուեստի թանգարանի մէջ։
Իրենց երգերով հանդէս եկան Երեւանէն յատկապէս ժամանած Լուիզա Երեմեան եւ Պոլսահայ արուեստագէտ Արթիւր Պաղտասարեան։
Երեկոյթի անակնկալն էր Տքթ. Յակոբ Այնթապլեանի պատուէրով եւ յատկապէս այսօրուան համար Մարգարիտ Սարգսեանի յօրինումով Զահրատի «Եիգիտ վարպետ մեծ Կոմիտաս» բանաստեղծութիւնը, որ առաջին անգամ որպէս տեսահոլովակ ներկայացուեցաւ հանրութեան։
Հուսկ բանքը արտասանեց Ամեն. Ս. Պատրիարք Հայրը եւ աշակերտներուն յիշեցուց, որ մահացած մարդոց տարեդարձ չի տօնուիր: Իսկ այսօր կը նշենք Զահրատի ծննդեան հարիւրամեակը, քանի ան իր կենդանութեան օրով պատրաստեց իր անմահութիւնը։
Հանդիսութեան աւարտին ներկաներուն եւ մեր վարժարաններու գրադարաններուն նուիրուեցաւ «Զահրատ-100, հատընտիր» հատորէն օրինակներ:
Հուսկ' ներկաներ վարժարանի ճաշարանին մէջ հիւրասիրուեցան Տիգրան Կիւլմէզկիլի կողմէ տրուած հոգեճաշի սեղաններու շուրջ:
