Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը յանուն Հայաստանեայց Առաքելական Սուրբ Եկեղեցւոյ Գերագոյն Հոգեւոր խորհուրդի, Մայր Աթոռ Սուրբ Էջմիածնի միաբանութեան եւ հաւատաւոր ժողովուրդի ցաւակցագիր յղած է Համայն Վրաստանի Կաթողիկոս-Պատրիարք Նորին Սրբութիւն Իլիա Բ-ի վախճանման առիթով։
«Նորին Սրբութիւն Իլիա Բ Կաթողիկոս-Պատրիարքի բազմամեայ հովուապետական ծառայութեան ընթացքը վկայութիւն եղաւ հաւատքի ամրութեան ու հոգեւոր նուիրեալ առաջնորդութեան։ Անոր հովուապետութիւնը նշանաւորուեցաւ Վրաստանի հոգեւոր կեանքի վերազարթօնքով, եկեղեցական կեանքի զօրացմամբ եւ աշխուժացմամբ։ Դժուարին ժամանակներուն երջանկայիշատակ Պատրիարքը հայրական իմաստութեամբ եւ սիրով առաջնորդեցաւ իր հաւատաւոր հօտը՝ հաստատուն պահելով Վրաց Սուրբ Եկեղեցւոյ առաքելութիւնը», - ըսուած է Ամենայն Հայոց Կաթողիկոսի ցաւակցագրի մէջ։
Վեհափառ Հայրապետը Ամենակալ Տիրոջ մխիթարութիւնը կը հայցէ Վրաց Ուղղափառ Եկեղեցու հոգեւորականութեան ու վրաց սգակիր բարեկամ ժողովուրդին՝ մաղթելով, որ Նորին Սրբութեան յիշատակը միշտ վառ մնայ հաւատաւոր իր զաւակներու սրտերուն եւ ներշնչման աղբիւր դառնայ գալիք սերունդներուն համար։
