Արշաւ՝ եկեղեցւոյ կարգ ու կանոնին բարեկարգման համար

ՀՀ վարչապետ Նիկոլ Փաշինեան դիմատետրի իր էջին վրայ յայտարարած է Հայաստանեայց Առաքելական Սուրբ Եկեղեցւոյ բարենորոգման վերաբերեալ գրութիւն մը։

Ան նաեւ հրապարակած է 10 եպիսկոպոսներու ստորագրութեամբ շարաթրուած յայտարարութեան պատճէնը։

«Մենք կը գտնուինք ՀՀ վարչապետի կենցավայրը եւ արդէն քանի մը ժամ քննարկած եւ համաձայնեցուցած ենք հետեւեալ յայտարարութիւնը՝ Հայաստանեայց Առաքելական Սուրբ Եկեղեցւոյ բարենորոգման վերաբերեալ գաղափարներ։»

Ստորեւ կը ներկայացնենք սոյն պատճէնէն նախադասութիւնները.

«Մենք՝ ներքոստորագրեալներս հաւատալով եւ հաւատարիմ ըլլալով մեր Տէր եւ Փրկիչ Յիսուս Քրիստոսի վարդապետութեան, Սրբոց Թադէոս եւ Բարթողոմէոս առաքեալներու քարոզչութեամբ սերմանուած հաւատքի, Գրիգոր Լուսաւորչի եւ Տրդատ Գ Մեծ հայոց թագաւորի ջանքերով հիմնադրուած Հայաստանեայց Առաքելական Սուրբ Եկեղեցւոյ սրբազան աւանդութեան, ընդգծելով ՀՀ հանրութեան զարգացման եւ ազգային ինքնութեան պահպանման կենսական գործին Հայաստանեայց Առաքելական Սուրբ Եկեղեցւոյ առանցքային դերն ու նշանակութիւնը, մտահոգուած ըլլալով Հայաստանեայց Առաքելական մեր Սուրբ Եկեղեցւոյ փաստացի պետի եւ անոր ձեւաւորած մերձաւոր շրջապատի ներկայացուցիչներու կողմէն Աւետարանի սկզբունքներով ապրելու եւ քարոզելու առաքելութեան ձախողմամբ, հոգեւոր կեանքի խաթարմամբ, բարքերու այլասերման աղաղակող փաստերու նկատմամբ հանդուրժողականութեան դրսեւորմամբ, կը յայտարարենք Հայաստանեայց Առաքելական Սուրբ Եկեղեցւոյ բարենորոգման մեկնարկի մասին, որ կ՚իրականացուի հետեւեալ ճանապարհային քարտեզով»,- ըսած է վարչապետը։

Այդ կէտերն են.

1. Բարենորոգման օրակարգի հանրահռչակումը։
2. Հայաստանեայց Առաքելական Սուրբ Եկեղեցւոյ փաստացի պետի հեռացումը (հանգստի կոչում)։
3. Սահմանուած կարգով Կաթողիկոսական տեղապահի ընտրութիւն։
4. Հայաստանեայց Առաքելական Սուրբ Եկեղեցւոյ Կանոնադրութեան ընդունուիլը, Կանոնադրութեան պէտք է սահմանուին ամրագրուած սկզբունքներու պահպանման, ֆինանսական թափանցիկութեան եւ հոգեւորականներու բարեվարքութեան ապահովման կառուցակարգեր։
5. Սահմանուած կարգով Ամենայն Հայոց Կաթողիկոսի ընտրութիւն։

Տասը եպիսկոպոսներու յայտարարութիւնը

Տասը եպիսկոպոսներ, որոնք հանդիպած էին ՀՀ վարչապետ Նիկոլ Փաշինեանի հետ, Դեկտեմբերի 18–ի երեկոյեան հանդէս եկած են յայտարարութիւնով՝ արտայայտելով մտահոգութիւն Հայ Առաքելական Եկեղեցւոյ շուրջ ընթացող գործընթացներու վերաբերեալ։ Անոնք քննադատած են եկեղեցւոյ կառավարման ընթացքը, նշած եկեղեցւոյ եւ պետութեան համար հնարաւոր վտանգները եւ կոչ ըրած են հոգեւորականներուն ու հաւատաւոր ժողովրդին միաւորուիլ՝ Դեկտեմբերի 18-ին, ժամը 17:00-ին, Մայր Աթոռ Սուրբ Էջմիածնի մէջ հաւաքուելու եւ Ամենայն Հայոց Կաթողիկոս Գարեգին Բ-ին հանգստի կոչ ընելու պահանջով։ «Դեկտեմբերի 18-ին, ժամը 17:00-ին, եկէք եւ միացէք մեզ համայն հայութեան հոգեւոր կեդրոն Մայր Աթոռ Սուրբ Էջմիածնի մէջ`Ամենայն Հայոց Կաթողիկոս Գարեգին Բ-ին հանգստի կոչելու արդար պահանջով, որ այլեւս դարձած է անյետաձգելու անհրաժեշտութիւն», – նշուած է եպիսկոպոսներու յայտարարութեան մէջ։

Աւելի վաղ Փաշինեան անդրադարձած է Գարեգին Բ–ի կուսակրօնութեան հարցին։

«Եթէ պարզուի, որ իրօք Գարեգին Բ–ն խախտած է կուսակրօնութեան ուխտը եւ զաւակ ունի, ան չի կրնար ըլլալ Ամենայն Հայոց Կաթողիկոս, որովհետեւ խնդրոյ առարկայ փաստի առկայութեան պահուն ան չէր կրնար ըլլալ կուսակրօն քահանայ։ Սա կ՚արձանագրեմ ամենայն յարգանքով բոլորի անձնական եւ ընտանեկան կեանքի գաղտնիութեան իրաւունքի նկատմամբ, բայց Ամենայն Հայոց Կաթողիկոսը չի կրնար ունենալ այսպիսի անձնական կեանք։ Խնդիրը կը բարձրացնեմ որպէս Հայ Առաքելական Եկեղեցւոյ հետեւորդ, որովհետեւ կը տեսնեմ հոգեւոր անվտանգութեան խնդիր, կ՚ըսեմ նաեւ որպէս ՀՀ վարչապետ, որովհետեւ կը տեսնեմ պետական անվտանգութեան խնդիր։ Մայր Աթոռ Սուրբ Էջմիածինը պիտի դիրքաւորուի այս իրավիճակի նկատմամբ, անկէ ետք կ՚իրականացուի հարցի յետագայ պարզաբանութիւն»,– գրած է Փաշինեան։

Շուեցարիոյ Հայոց Թեմի առաջնորդական տեղապահը միացաւ Փաշինեանին

«Յարգանքներուս հաւաստիքը Շուեցարիայի թեմի առաջնորդական տեղապահ Տէր Գուսան ծայրագոյն վարդապետ Ալճանեանին»։ Այդ մասին դիմատետրի իր էջին գրած է Վարչապետ Նիկոլ Փաշինեան։ Նշենք, որ Շուեյցարիոյ Հայոց Թեմի Առաջնորդական տեղապահ Տէր Գուսան ծայրագոյն վարդապետ Ալճանեանը ողջունելով Փաշինեանի եւ տասը հոգեւորականներու կողմէ կազմուած Համակարգող խորհուրդի ստեղծումը, յայտարարած է, որ կը միանայ անոնց, կ՚ընդունի հռչակագիրի բովանդակութիւնը ու ճանապարհային քարտէզը։

Նիկոլ Փաշինեանը հրաւիրեց ուխտերթի

Վարչապետ Նիկոլ Փաշինեան տեսաուղերձ մը հրապարակելով Յունուարի 6-ին՝ ժամը 13.30-ին ժողովուրդը հրաւիրեց ուխտերթին։

Ան նշեց նաեւ, որ ուխտերթը կը մեկնարկի Երեւանի Սուրբ Գրիգոր Լուսաւորիչ Եկեղեցւոյ եւ կ՚ուղղուի դէպի Երեւանի Սուրբ Աստուածածին Կաթողիկէ եկեղեցի, որ կը գտնուի Սայաթ-Նովա փողոց։

Վարչապետը նշած է, որ այս ունի երեք խորհուրդ, այդ թուին՝ աջակցութիւն եկեղեցւոյ բարենորոգման եւ նաեւ՝ պետութեան։

«Մենք այլեւս մեր եկեղեցին մինակ չենք թողներ»

Վարչապետ Նիկոլ Փաշինեան Սուրբ Աստուածածին Կաթողիկէ Եկեղեցւոյ բակին հաւաքուած քաղաքացիներու առջեւ հանդէս եկաւ ելոյթով՝ անդրադառնալով պետութեան, եկեղեցւոյ եւ խաղաղութեան օրակարգին։

Վարչապետը նշեց, որ տեղի ունեցած քայլարշաւը քրիստոնէական խորհուրդ ունի։

«Մենք այսօր կը վերահաստատենք որպէս առաջին քրիստոնէութիւն ընդունած պետութիւն եւ այսօրուայ մեր քայլարշաւը կը խորհրդանշէ, որ մենք, ի վերջոյ, սկսած ենք քայլել մեր Փրկիչ Յիսուս Քրիստոսի նախանշած ուղիով»,- ըսաւ ան։

Վարչապետը անդրադարձաւ նաեւ խաղաղութեան թեմային. «Մենք բոլորս շատ երկար ժամանակ խաղաղութեան համար աղաչած ենք Աստուծոյ, բայց ի վերջոյ եկած է այն պահը, երբ մենք հասկցանք, որ խաղաղութեան համար Աստուծոյ աղաչելու զուգահեռ մենք ինքներս պէտք է մեր որոշումներով, մեր գործողութիւններով, մեր քայլերով ստեղծենք այդ խաղաղութիւնը»։

Փաշինեան հերքած է այն պնդումները, թէ Կառավարութիւնը կը գործէ եկեղեցւոյ դէմ։

«Շատ կ՚ըսեն, թէ Կառավարութիւնը կը գործէ եկեղեցւոյ դէմ։ Կառավարութիւնը չէ գործած, չի գործեր եւ երբեք չի կրնար գործել եկեղեցւոյ դէմ, որովհետեւ Կառավարութիւնը Հայաստանեայց Առաքելական Սուրբ Եկեղեցւոյ հետեւորդ է»։

Միեւնոյն ժամանակ, ան նշեց, որ թոյլ չի տար եկեղեցին օգտագործել պետութեան դէմ։

Վարչապետը նաեւ յայտարարած է, որ եկեղեցին պէտք է «ազատել» Գարեգին Բ-էն։

Ելոյթի վերջացման Նիկոլ Փաշինեան կոչով դիմած է քաղաքացիներուն. «Ես մեր ժողովուրդին կոչ կ՚ընեմ. այո՛, երթանք պատարագներուն, եւ իրենց հոգեւոր սպասաւորներուն յորդորենք, խնդրենք՝ միանան Հայաստանեայց Առաքելական Սուրբ Եկեղեցւոյ բարենորոգման օրակարգին՝ յանուն Հայաստանեայց Առաքելական Սուրբ Եկեղեցւոյ, յանուն Հայաստանի Հանրապետութեան եւ յանուն մեր Տէր եւ Փրկիչ Յիսուս Քրիստոսի»։