Չորեքշաբթի յետմիջօրէի առումով Սիլիվրիի արգելանոցին համալիրին մէջ պատրաստուած դատական գործողութիւնը կը շարունակուի երրորդ օրն եւս։
Իսթանպուլի ընտրեալ քաղաքապետ Էքրեմ Իմամօղլու եւ իր աւելի քան 400 գործընկերները կը մեղադրուին քաղաքապետական գործողութիւններու ընթացքին շահագործումներու պատճառաւ։
Ժողովրդահանրապետական կուսակցութեան պետը եւ այլ կուսակցականներ ի սկզբանէ կը պնդեն թէ մեղադրանքները հերիւրածոյ են եւ այս դատավարութիւնը կը միտի Էքրեմ Իմամօղլուի նախագահական թեկնածութեան արգելք ըլլալու։
Դատախազութեան պատրաստած ամբաստանագիրն ալ կ՚արդարացնէ կուսակցականներու այս պնդումները, քանի որ հոն ներկայացող մեղադրանքները ոչ թէ փաստերու, այլ զրպարտութեան բնոյթով կատարուած բողոքներու վրայ հիմնուած է։
Որպէս գործնական արդիւնք, դատարանը առաջին օրէն իսկ որդեգրեց մեղադրեալներու ազատազրկումը, կարծես կանխաւ պատժամիջոց։
Դատավարութիւնը ինքնին ընդվզումներու պատճառ դարձող բնոյթ ունի։ Թէ դատակազմը եւ թէ Սիլիվրիի գաւառապետը իրենց հրահանգած սահմանափակումներով ստեղծեցին արտակարգ իրավիճակի մը տպաւորութիւնը։ Կանխամիջոցներու գործադրումը յատուկ լարուածութիւն ստեղծեց մեղադրեալներուն, անոնց հարազատներուն եւ իրաւապաշտպաններուն մօտ։ Նկատելի էր դատաւորին քաղաքապետի հետ խօսելու պահուն անյարգալիր վերաբերմունքը։ Ան այդ ոճով կը փորձէր վարկազրկել 15 միլիոն քաղաքացիներու ձայներով նախագահի թեկնածու առաջադրուած Իմամօղլուն։
Թուրքիոյ այժմու բեւեռացման միջավայրին մէջ իշխանամետ եւ ընդդիմադիր լրատուամիջոցները իրարու խիստ հակասող մերձեցումներով կը նկարագրեն դատավարութիւնը։ Ներառեալ արդարադատութեան նոր նախարարը, ոմանց համաձայն Իմամօղլու շօուի հարթակի վերածած է դատարանը, իսկ ընդդիմադիրներու համաձայն ալ դատակազմը կը գործէ իշխանութեան կամայակատարի դիրքով։
Յայտնի է որ դատական գործողութիւնը ձեւակերպութիւն մը ըլլալու մատնուած է եւ ի զուր է այս նիստերէն արդարութիւն ակնկալել։
Հասարակութեան կարծիքը շօշափելու համար կատարուած հարցախոյզներն ալ կու տան համապատասխան արդիւնք, ըստ որու հասարակութեան մեծամասնութեան համոզումով խնդիրը քաղաքական բնոյթ ունի, այլ ոչ թէ արդարադատական։
