Ապրիլ 24-ի Յիշատակութեան Հարթակը, որ նախորդ տարիներուն Թաքսիմի, Թիւնէլի եւ Շիշհանէի մէջ կը կատարէր Ապրիլ 24, 1915-ի տարեդարձի յիշատակութեան ձեռնարկներ, այս տարի ուրբաթ օր, 24 Ապրիլին, Գատըգիւղի Սիւրէյյա Օփէրայի առջեւ ժամը 19:00-ին յիշատակութեան հաւաք կազմակերպելու համար Իսթանպուլի Կուսակալութեան դիմեց: Նախորդ չորս տարիներուն եւս Կուսակալութիւնը մերժած էր այդ դիմումները:
Ապրիլ 24-ի Յիշատակութեան Հարթակի յայտարարութիւնը հետեւեալն է.
«Ապրիլ 24-ի յիշատակութիւնը ժողովրդավարական իրաւունք մըն է... 2010 թուականէն մինչեւ համաճարակ, գլխաւորաբար Իսթանպուլի մէջ եւ շատ քաղաքներու, կատարած Ապրիլ 24-ի մեր յիշատակութիւնները սկսան արգիլուիլ համաճարակի սկիզբէն: Այս տարի եւս Իսթանպուլի Կուսակալութեան ներկայացուցինք մեր դիմումը ցեղասպանութեան յիշատակութեան կապակցութեամբ եւ սկսանք աշխատիլ 1915-ին կեանքը կորսնցուցածներու սուգը կրող ու դիմակայելու կոչեր հնչեցնող ձեռնարկի կազմակերպման համար: Կառավարութիւնը այս տարի եւս արգիլեց մեր յիշատակութեան ձեռնարկը: Մենք պիտի չհրաժարինք պնդելէ:Չորս-հինգ տարի առաջ հրապարակներու վրայ տեղի ունեցող յիշատակութիւնները առանց որեւէ բացատրութեան արգիլուիլ սկսելուն ոչ մէկ արդարացում կայ: Ապրիլ 24-ի յիշատակութիւնները թէ՛ կոտորուած հարիւր հազարաւոր մարդոց հանդէպ ունեցած մեր յարգանքին, ընտանիքներէն, բարեկամներէն, գործէն, շրջապատէն կտրուած ու սպաննուածները չմոռցած ըլլալու ապացոյցն է, թէ՛ այսօրուան, ապրողներուն տուած պատգամ մը: Ժողովրդավարութեան զարգացման, միասնական կեցութեան մշակոյթի ձեւաւորման, բռնութեան եւ ատելութեան խօսքի ետ մղման մէջ ամենէն կարեւոր քայլը Ապրիլ 24-ին կորսնցուցածները, անձերը, մշակոյթը, աւանդոյթները յիշեցնելն է. ցոյց տալ որ չենք մոռցած: Կը բողոքենք յիշատակութեան արգիլման դէմ եւ կոչ կը կատարենք որոշում կայացնողներուն վերանայելու իրենց դիրքորոշումը»։
Յիշատակութիւնները 2010-2019 թուականներուն կատարուած էին անդադար: Նախ Թաքսիմի Հրապարակին վրայ կատարուած յիշատակութիւնները աւելի ետք կրցան կատարուիլ Թիւնէլի Հրապարակին վրայ եւ վերջապէս Շիշհանէի մէջ կատարուած յիշատակութիւններէն ետք համաճարակի պատճառով հրապարակի վրայ յիշատակութիւն կատարել հնարաւոր չեղաւ: Սակայն համաճարակէն ետք յիշատակութիւններուն ոչ մէկ կերպով արտօնութիւն չտրուեցաւ:
