Պատրիարքութեան հոգեւորականաց դասու երիցագոյն անդամ Գերշ. Տ. Արամ Ս. Արքեպս. Աթէշեանի քահանայական ձեռնադրութեան ոսկեայ յոբելեանը սկսաւ նշուիլ 13 Նոյեմբեր 2026, Ուրբաթ երեկոյ, Ս. Որդւոց Որոտման եկեղեցի - Մեսրոպ Բ. Պատրիարք մշակոյթի կեդրոնի կամարներուն ներքեւ։
Հանդիսութեան պատուոյ հիւրը եղաւ Յունաց Ն.Ս.Տ.Տ. Պարթոլոմէոս Ա. Տիեզերական Պատրիարքը: Ն.Ա.Տ. Սահակ Բ. Պատրիարք Հօր շուրջ էին Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի ներկայացուցիչ եւ Արեւմտեան Եւորպայի Հայրապետական Պատուիրակ Գերշ. Տ. Խաժակ Ս. Արքեպս. Պարսամեան, Կրետէի Հայոց Հոգեւոր Տեսուչ Գերշ. Տ. Եզնիկ Ս. Արքեպս. Պետրոսեան, յոբելեար Գերշ. Տ. Արամ Ս. Արքեպս. Աթէշեան, Հայ Կաթոլիկ համայնքի Պատրիարքական Կառավարիչ Գերյ. Տ. Վարդան Թ. Ծ. Վրդ. Գազանճեան, Հայ Աւետարանական համայնքի հովիւ Վերապատուելի Գրիգոր Աղապալօղլու, Աթոռոյս վեղարաւոր միաբան հայրերը, քահանայից դասը, սարկաւագաց դասու անդամներ, համայնքային հաստատութիւններու ներկայացուցիչներ, վարժարաններու ներկայացուցիչներ, տնօրէններ, դպրաց դասերու դպրապետներ ու ատենապետներ, միութիւններու վարիչներ, մամլոյ ներկայացուցիչներ, կրթական մշակներ, մեծարեալ Սրբազան Հօր ընտանիքն եւ այլ հիւրեր։
Յովակիմ վրդ. Սերովբեանի ճառախօսութենէ եւ Սիլվա Կոմիկեանի ասմունքէ ետք տեսասփռուեցաւ յոբելեար Սրբազան Հօր մասին պատրաստուած «Ճամբան ու մարդը» փաստավաւերագրական կարճաժամկէտ ժապաւէնը։ Տիգրան Պասկեւիչեանի կողմէ Երեւանի մէջ պատրաստուած ժապաւէնը
Հանդիսութեան աւարտին սրտի խօսքով հանդէս եկաւ յոբելեար Տ. Արամ Արքեպս. Աթէշեան, յուզուած շեշտով արտասանեց շնորհակալութեան եւ երախտիքի խօսքը։
Յոբելենական պաշտօնական ընթրիքով մեծարուեցաւ Արամ Արքեպիսըոպոս Աթէշեան
Արամ Արքեպս. Աթէշեանի քահանայական ձեռնադրութեան ոսկեայ յոբելեանի պաշտօնական ընթրիքը տեղի ունեցաւ 14 Նոյեմբեր 2026, Շաբաթ, Աթոռանիստ Մայր Եկեղեցւոյ համալիրի Յարութիւն Ամիրա Պէզճեան սրահին մէջ:
Յանուն քաղաքիս քրիստոնեայ համայնքներու հոգեւոր պետերու ուղերձ մը կարդաց Յունաց Ն.Ս.Տ.Տ. Պարթոլոմէոս Ա. Տիեզերական Պատրիարքը եւ բարձր գնահատեց յոբելեար Սրբազանի նուիրումն ու կէս դարու ծառայութիւնը։ Նորին Սրբութիւնը գեղեցիկ պանակէ մը նուիրեց Արամ Սրբազանին։ Ապա բերուեցաւ յոբելենական կարկանդակը, որ յոբելեար Սրբազան Հայրը հայոց եւ յունաց պատրիարքներու հետ միասնաբար կտրեց։
Սրտի խօսքով հանդէս եկաւ յոբելեար Սրբազան Հայրը եւ իր երջանկութիւնը արտայայտեց։ Բայց, ըսաւ ան, իր ուրախութիւնը աւելի միասին ըլլալու պատճառաւ էր։ Յոբելեար Սրբազան Հայրը շնորհակալութիւն յայտնեց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսին, Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսին, Երուսաղէմի Պատրիարք Ն.Ա.Տ. Նուրհան Արք. Մանուկեանին, Ն.Ա.Տ. Սահակ Բ. Պատրիարք Հօր, Ն.Ս.Տ.Տ. Պարթոլոմէոս Ա. Տիեզերական Պատրիարքի գլխաւորութեամբ քոյր եկեղեցիներու հոգեւոր պետերուն, կարգադիր յանձնախումբին եւ առ հասարակ բոլորին։
Հուսկ բանքը արտասանեց Ն.Ա.Տ. Սահակ Բ. Պատրիարք Հայրը եւ ապա գեղեցիկ լանջախաչ մը եւ պանակէ մը նուիրեց Արամ Սրբազանին:
Հայրապետական Կոնդակով Ս. Ղեւոնդ Երէց շքանշան շնորհուեցաւ Գերշ. Տ. Արամ Արքեպիսկոպոսին
Գերշ. Տ. Արամ Ս. Արքեպս. Աթէշեանի քահանայական ձեռնադրութեան ոսկեայ յոբելեանի առթիւ կայացող միջոցառումները աւարտին հասան 15 Նոյեմբեր Կիրակի օր Ն.Ա.Տ. Սահակ Բ. Պատրիարք հօր նախագահած գոհաբանական Սուրբ Պատարագով, Ս. Աստուածածին Աթոռանիստ Մայր Տաճարի մէջ։
Երգեցողութիւնները կատարուեցան Եկեղեցւոյ Պոլսահայ միացեալ արական երգչախումբի կողմէ, առաջնորդութեամբ Բրկ. Յովսէփ Ուր. Դպ. Գույումճեանի եւ երգեհոնահարութեամբ Բրշ. Յարութիւն Էտվին Սրկ. Կալիպեանի։
Գերշ. Տ. Խաժակ Արքեպս. շքանշանով զարդարեց յոբելեար Գերշ. Տ. Արամ Արքեպս. Աթէշեանի լամբակը:
Ապա Գերշ. Տ. Եզնիկ Ս. Արքեպս. Պետրոսեան խօսեցաւ եւ ըսաւ, որ Կրետէի մեր համայնքը կը յիշէ Արամ Սրբազանի այցելութիւնները եւ կը փափաքի երախտիքը ցուցաբերել եւ Սրբազան Հօր կը նուիրէ վարդապետական խաչ եւ եպիսկոպոսական պանակէ եւ նուէրը յանձնեց Նորին Սրբազնութեան:
Ապա պատարագիչ յոբելեար Գերշ. Տ. Արամ Արքեպս. շնորհակալութիւն յայտնեց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսէն, Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսէն, Ն.Ա.Տ. Նուրհան Երուսաղէմի Պատրիարքէն, Ն.Ա.Տ. Սահակ Բ. Թուրքիոյ Հայոց Պատրիարքէն սկսեալ բոլորին։
Յաւարտ Ս. Պատարագի, Նորին Ամենապատուութեան նախագահութեամբ, հանգստեան աղօթքով յիշատակուեցան յոբելեար Սրբազան Հօր ծնողները՝ հայրն ու տիրամայրը, հոգեւոր ծնողը՝ Երանաշնորհ Շնորհք, Երանաշնորհ Գարեգին Ա. եւ Երանաշնորհ Մեսրոպ Բ. Պատրիարները, ինչպէս նաեւ Պատրիարքական Աթոռոյս հանգուցեալ հոգեւորականները։
Հուսկ, կազմուած թափորը խորհրդարան առաջնորդեց Նորին Ամենապատուութիւնն ու պատարագիչ յոբելեար Սրբազան Հայրը, ուր տրուած վերջին օրհնութեամբ աւարտին հասան Սուրբ Պատարագն ու յոբելենական հանդիսութիւնները։



