Իսրայէլեան բանակը յայտարարեց
Ստորագրուած է եռակողմ զինուորական համագործակցութեան ծրագիր
Իսրայէլեան բանակը յայտարարեց, թէ Յունաստանի եւ Կիպրոսի հետ ստորագրած է եռակողմ զինուորական համագործակցութեան ծրագիր մը՝ նպատակ ունենալով զսպել արեւելեան Միջերկրականին մէջ թրքական ազդեցութիւնը։ Ծրագիրը կը նախատեսէ կանոնաւոր միացեալ ռազմափորձեր, յատուկ ուժերու ստորաբաժանումներու վարժեցում եւ խորհրդակցութիւններ բարձրագոյն զինուորական հրամանատարութեան մակարդակով։
Այս համագործակցութեան հիմնական նպատակը ընդհանուր պաշտպանական կարողութիւններու ամրապնդումն է եւ երեք կողմերուն գործողութիւններու սերտ համակարգումը Միջերկրական ծովուն մէջ։
Իսրայէլեան լրատուամիջոցներ կ՛ընդգծեն, որ այս դաշինքը շրջանին մէջ Թուրքիոյ աշխուժութեան ուղղակի պատասխան է եւ ուղղուած է մասնակցող երկիրներու ուժանիւթային եւ տարածքային շահերու պաշտպանութեան:
Իսրայէլեան «Ետիոթ Ահրոնոթ» օրաթերթը նշեց, որ Իսրայէլի վարչապետ Պենիամին Նեթանիահու, առանց անունը նշելու, պատգամ մը յղած է Թուրքիոյ նախագահ Ռեչեփ Թայիփ Էրտողանին՝ ըսելով. «Անոնց, որոնք կայսրութիւններու հաստատման եւ մեր երկրին տիրելու մասին կ՛երազեն, կ՛ըսեմ՝ մոռցէ՛ք, պիտի չպատահի, նոյնիսկ այդ մասին մի՛ մտածէք»։
