«Ակօս» կարդալը յանցանք համարեցին

Երկրէ ներս տիրող խտրականութեան ապացոյցներէն մէկն ալ յայտնուեցաւ ուսուցիչի մը դէմ անհանդուրժողութեան երեւոյթով։

Թրքերէն լեզուի եւ գրականութեան ուսուցիչ Իսմիպէյ Կիւշելի կը պաշտօնավարէր Ավճըլար, Ֆիւրուզքէօյի Անատոլու Լիսէին մէջ։

Ան 2025-ի Հոկտեմբերին տեղփոխուեցաւ Քիւչիւքչեքմեճէի Քատրիյէ Մօրօղլու Անատոլու Լիսէսի։

Այս պաշտօնափոխութենէն ետք պարզուեցաւ որ իր նախկին դպրոցի մէջ զանազան բողոքագրութիւններ կատարուած են պնդելով թէ ան ոսւուցչանոցի մէջ կը կարդար «Ակօս» եւ «Էվրենսել» թերթերը։ Բողոքագիրները նաեւ կը նշէին թէ ան յաճախ հայանպաստ ելոյթներ կ՚ունենար եւ կը փառաբանէր ալեւիութիւնը։

Կիւշելի այս մասին իր իրաւունքները պաշտպանելու համար փաստաբան Պիլկիւթայ Հաքքը Տուրնայի միջոցաւ դատարան դիմած է։

Փաստաբանը «Ակօս»ին յայտնած է թէ գործադրութիւնը կասեցնելու համար կատարուած դիմումը մերժուած է դատարանի կողմէ, հետեւաբար դիմումը փոխանցած են Բարձրագոյն Ատեան։

Մինչ այդ պաշտօնավայրի փոփոխութիւնը յաւելեալ դժուարութիւններ բեռցուցած է տուժող ուսուցչին։