Գիտէ՞ք այս ամանորի երգը
Ամանորի խաղ՝ «Տօն տօն է»
Ամանորի առիթով ձեզի հետ կը բաժնենք «Տօն տօն է» խաղի տեսերիզը եւ խօսքերը։
Անահիտ Սարգիսեան հեղինակութեամբ ստեղծուած «Բառ ու պար» ծրագիրը 9 խաղերէ բաղկացած շարք մըն է, ուր խաղերը ներկայացուած են տեսերիզներու միջոցաւ։ Շարքը ներշնչուած եւ քաղուած է աւանդական խաղերէ, հիւսուած Անահիտ Սարգիսեանի կողմէ։ Այս խաղերը կարելի է խաղալ խումբով, բացօթեայ կամ սրահի մէջ։
Վարի յղումի միջոցաւ կրնաք հասնիլ իւրաքանչիւր խաղի էջին, ուր կարելի է գտնել խաղին տեսերիզը եւ խօսքերը։
«Բառ ու պար» մաս կը կազմէ այն ծրագիրներուն, որոնք 2022-ի Հոկտեմբեր 23-էն 30 եւ 2024-ի Ապրիլ 13-էն 20, Ֆրանսայի Վիլէօրպան քաղաքին մէջ կայացած Արեւմտահայերէնի նորարարութեան աշխատանոցներէն ներշնչուելով երեւան եկան։
Ամանորի խաղ
Տօն, տօն է,
այսօր տօն է…
Նոր տարին եկեր է,
մեր դուռը կը թակէ…
Տօն, տօն է,
այսօր տօն է…
Նոր տարին եկեր է,
ձեր դուռը կը թակէ…
Տօն, տօն է,
այսօր տօն է…
Նոր տարին եկեր է,
դռները կը թակէ…
Տօն, տօն է,
այսօր տօն է…
Նոր տարին եկեր է,
կաղին նուշ ընկոյզ,
չիր ու չամիչ բերեր է…
Աջ գրպանս լեցուն է,
ձախ գրպանս լեցուն է,
իսկ փորիկս լե՛փ լեցուն է…
Տօն, տօն է,
այսօր տօն է…
յ․գ․
Կարելի է խաղալ նաեւ Զատիկին՝
Տօն, տօն է,
այսօր տօն է…
Զատիկը եկեր է,
մեր դուռը կը թակէ…
Տօն, տօն է,
այսօր տօն է…
Զատիկը եկեր է,
կարմիր հաւկիթ բերեր է
կամ
գոյն գոյն հաւկիթ բերեր է…
