Արամ Մանուկեանի արձանի բացումը
Երեւանի կեդրոնական հատուածի վրայ տեղադրուած է դաշնակցական քաղաքական գործիչ Արամ Մանուկեանի արձանը։ Այս առթիւ տեղի ունեցած է բացման յատուկ արարողութիւն, որ սկսած է Գարեգին կաթողիկոսի աղօթքով։ Ապա ելոյթ ունեցած է Հայաստանի Հանրապետութեան վարչապետ Նիկոլ Փաշինեան։ Ան իր ելոյթին մէջ ընդգծեց Արամ Մանուկեանի առաքելութիւնը մանաւանդ պետականացման գործընթացին մէջ։ «Ո՞վ է Արամ Մանուկեանը։ Թերեւս սխալած չեմ լինի, եթէ ասեմ որ ան եղաւ մեր նորագոյն պատմութեան մեծագոյն առաքեալը։ Ան ապրեց ու գործեց իրականացնելու համար մեծ առաքելութիւն մը եւ յաջողեցաւ։ Յաղթանակ գտնելը մեծագոյն առաքելութիւն էր մանաւանդ այդ ժամանակի պայմաններուն մէջ։ Ան յաղթանակ ձեռքբերեց պարտութիւններու տեղատարափին մէջ։ Յոյս գտաւ յուսահատութեան հեղեղին մէջ։ Ուժ գտաւ, երբ թեւերը թուլացած էին, ծունկերը ծալլուած եւ մէջքը կոտրուած։ Իր մահն ալ նման էր ժողովուրդի տառապանքին, ունեցաւ ամբողջ ժողովուրդը կոտորող տիֆէն իրեն վիճակած բաժինը։ Այժմ մենք ունինք նման առաքելութիւն, որ կը պարտադրէ արժանի ըլլալ Արամ Մանուկեանի թողած ժառանգին։ Յետ այսու ամէն անգամ որ կ՚անցնինք այս արձանի առջեւով, կը նայինք իր աչքերուն եւ կ՚ըսենք թէ. -Մենք տէրն ենք քու առաքելութեան, քու գործը կիսատ չենք թողած եւ հայ ժողովուրդը յաղթանակած է յաւիտեան-»։
Հանդիսութեան ընթացքին ելոյթ ունեցաւ նաեւ ՀՅԴ պիւրոյի անդամ Կիրօ Մանոյեան, որ իր կարգին ողջունեց այս թէեւ ուշացած, բայց կատարին հասած յարգանքի տուրքը։ Կիրօ Մանոյեան ապա յոյս յայտնեց թէ կը գործադրուի այդ յարգանքի տուրքի շարունակութիւնները եւս, որոնք են Արամի փողոցի վերանուանումը, որպէս Արամ Մանուկեան փողոց։ Մանոյեան նաեւ պահանջեց, որ նախապէս Արամ Մանուկեանի բնակած շէնքը, որուն միայն պատերը մնացած են ,վերակառուցուի եւ վերածուի այս մեծ գործիչի անունը կրող տուն-թանգարանի։ Հանդիսութիւնը աւարտեցաւ Արամ Մանուկեանի խօսքերէն մէջբերումով մը, ուր ան կ՚ըսէր. «Մենակ ենք ու պէտք է ապաւինենք միայն մեր ուժերին, թէ ճակատը պաշտպանելու, թէ երկրի ներսը կարգ հաստատելու համար»։
