Պատրիարք Հայրը հանդիպումներ ունեցաւ Անգարայի մէջ
Ն.Ա.Տ. Սահակ Բ. Պատրիարք Հայրը 14 Դեկտեմբեր, Կիրակի օր, Անգարայի մէջ սարքուելիք մեծ համերգին մասնակցելու համար մայրաքաղաք մեկնեցաւ։
Հանրապետութեան Նախագահական Սենֆոնիկ Նուագախումբի եւ Պետական Բազմաձայն Երգչախումբի մասնակցութեամբ կազմակերպուած համերգին Թուրքիոյ զանազան քաղաքներէն երգչախումբերու 500 անդամներ ներկայ գտնուեցան։ Սոյն մեծ համերգին մաս կազմեցին նաեւ Ֆերիգիւղի Եկեղեցւոյ Վարդանանց Դպրաց Դաս Երգչախումբը։
«Միասին Երգէ» համերգը
Պետական բազմաձայն երգչախումբը Համաշխարհային երգչախումբերու օրուան առթիւ «Միասին երգէ» համերգով երաժշտասէրներուն ներկայացաւ CSO Ատա Անգարա Զիրաաթ Դրամատան մայր դահլիճին մէջ։
Երգչախումբերու համաշխարհային օրուան առթիւ կազմակերպուած այս համերգին Ֆերիգիւղի Վարդանանց Դպրաց Դաս երգչախումբը հանդէս եկաւ որպէս հիւր երգչախումբ՝ Հաճէթթեփէ համալսարանի սենֆոնիկ նուագախումբի, Պետական բազմաձայն երգչախումբի եւ Պետական բազմաձայն մանկական երգչախումբերու հետ միասին։
Համերգին Պատրիարք Հօր կողքին էին նաեւ Թուրքիայի հայ կաթոլիկ համայնքի պատրիարքական կառավարիչ Գերյ. Տ. Վարդան Թ. Ծ. Վրդ. Գազանճեան, Ֆերիգիւղի Եկեղեցւոյ հոգեւոր հովիւ եւ Վարդանանց Դպրաց Դաս Երգչախումբի նախագահ Արժ. Տ. Կորիւն Ա. Քհնյ. Ֆեներճեան, Արժ. Տ. Թէոդիկ Քհնյ. Չեթինքայա, Ատենապետ Մանուկ Էօղէրի գլխաւորութեամբ Ֆերիգիւղի Ս. Վարդանանց Եկեղեցւոյ Թաղային Խորհուրդի անդամներ, Վարդանանց Երգչախումբի խմբավար Սիպիլ Արսէնեան, Հանրապետութեան Նախագահի Մշակութային խորհրդականներէն Արամ Քուրան եւ Կարօ Վռամ Պապայեան։
Պատրիարք Հայրը այցելեց Մշակոյթի եւ Զբօսաշրջութեան Նախարարին
Ն.Ա.Տ. Սահակ Բ. Պատրիարք Հայրը, շարունակելով Անգարայի հանդիպումները, 15 Դեկտեմբեր 2025, Երկուշաբթի, իր պաշտօնատեղիին մէջ այցելեց Մշակոյթի եւ Զբօսաշրջութեան Նախարար Մեհմետ Նուրի Էրսոյը։
Հանդիպումին ներկայ եղան փոխ նախարար Կէօքհան Եազկը, Վաքըֆներու գլխաւոր տնօրէն Սինան Աքսու, Հանրապետութեան Նախագահի Մշակութային խորհրդականներէն Արամ Քուրան, Արժ. Տ. Թէոդիկ Քհնյ. Չեթինքայա, Տիյարպաքըրի Ս. Կիրակոս Եկեղեցւոյ Ծխական Խորհուրդի ատենապետ Վարդգէս Էրկիւն Այըք եւ Կարօ Վռամ Պապայեան։
Հանդիպումի ընթացքին 6 Փետրուարի երկրաշարժներու պատճառաւ վնասուած Իսկենտէրունի Ս. Քառասուն Մանկունք Եկեղեցւոյ վերականգնման նախագիծի վերաբերեալ տեղեկութիւն տրուեցաւ: Խնդրանք ներկայացուեցաւ աղօթավայրերու վերանորոգման համար տրամադրուող աջակցութենէն օգտուելու համար։ Ինչպէս նաեւ, տեղեկութիւն տրուեցաւ Տիյարպաքըրի Սուրբ Սարգիս Եկեղեցւոյ վերանորոգման գործընթացի մասին եւ օժանդակութիւն խնդրուեցաւ։
Նորին Ամենապատուութիւնը ընդգծեց, որ Վանի Վարագայ վանքի վերականգնումն ու վերաբացումը մեծապէս կը նպաստէ շրջանի զբօսաշրջութեան, ինչպէս նաեւ կը ծառայէ մշակութային եւ պատմական ժառանգութեան պահպանումին։ Այցելութեան ընթացքին տեղեկութիւն ստացուեցաւ նաեւ Անիի աւերակներու եւ Հռոմկլայի աշխատանքներու վերաբերեալ։
Պատրիարք Հայրը յատկապէս գոհունակութիւնը յայտնեց Իսթանպուլի Աթաթիւրքի անուան մշակութային կեդրոնին համայնքի գեղարուեստական գործունէութեանց համար տրամադրումի ընթացքին ցուցաբերուած աջակցութեան համար։
Այցելութիւն՝ Ներքին Գործոց Նախարարին
Սահակ Բ. Պատրիարք Հայրը, շարունակելով Անգարայի հանդիպումներուն, 16 Դեկտեմբեր Երեքշաբթի օր, իր պատուիրակութեամբ, պաշտօնարանին մէջ այցութիւն տուաւ Ներքին Գործոց Նախարար Ալի Երլիքայային։
Հանդիպման ներկայ էին ԱՔՓ Կուսակցութեան Իսթնպուլի երեսփոխան, Տքթ. Սեւան Սվաճըօղլու, Հանրապետութեան Նախագահի Մշակութային խորհրդական Արամ Քուրան, Արժ. Տ. Թէոդիկ Քհնյ. Չեթինքայա եւ Կարօ Վռամ Պապայեան։
Հիւանդանոցներու վարչութեանց ընտրութիւններու դեռ սպասուող արտօնութեան մասին իր մտահոգութիւնները արտայայտելով՝ մեր Հոգեւոր Պետը նշեց իր փափաքը, որ նոր սահմանադրութեան մշակման գործընթացին փոքրամասնութիւնները եւս ներկայացուին եւ անոնց կարծիքները հաշուի առնուին։
Ներքին Գործոց Նախարար Երլիքայա նշեց, որ այս հարցերու շուրջ աշխատանքը պիտի իրականացուի զգայնութեամբ։
Նորին Ամենապատուութիւնը 17 Դեկտեմբեր 2025, Չորեքշաբթի իրիկուն Իսթանպուլ պիտի վերադառնայ։
