Պրուսայի մէջ «ՖօթօՖեսթ»
Պրուսայի Քաղաքապետարանը գործակցելով քաղաքի լուսանկարչութեան եւ շարֆանկարի հասարակական կազմակերպութիւններու հետ 15-րդ անգամ կը կազմակերպէ լուսանկարի փառատօնը։
Միջոցառման բացման ճառը արտասանող քաղաքապետ Մուսթաֆա Պոզպէյ նշեց որ լուսանկարչական փառատօնը քաղաքի մշակութային ու գեղարուեստական կեանքի մէջ կարեւոր նշանակութիւն ունի։ Յատուկ գիտակցութիւնով կ՚ուզեն այս մշակութային միջոցառումը ծաւալել ամբողջ քաղաքին։ «Մենք Պուրսան կ՚ընկալենք իր 17 գաւառներով։ Կը հաւատանք որ արուեստը պէտք է հասանելի ըլլայ բոլորին։ Այդ համոզումով ալ «ՖօթօՖեսթ»ը կը կայանայ 12 տարբեր վայրերու վրայ» ըսաւ քաղաքապետը։
Փառատօնի զոյգ քուրուաթէօրներ Կիւլպին Էօզտամար Աքարչայ եւ Էօզճան Եուրտալան պարզեցին այս տարուայ խորագիրը՝ «Բեկման պահը», ընդգծելով որ այս արտայայտութիւնը լոկ կործանումը չէ, այլ վերածնունդը եւ յոյսերը վառ պահելու ներուժն ալ կը պահէ իր մէջ։
Փառատօնի ծիրէն ներս 15 միջազգային եւ 15 ալ տեղացի լուսանկարիչներու գործերը կը ցուցադրուին։
Բացի անհատներէ լուսանկարչական խմբակներու արտադրութիւններն ալ ցուցադրուեցան զանազան վայրերու մէջ։ Անոնց կարգին էր նաեւ պոլսահայ արհեստավարժ եւ սիրողական լուսանկարիչներու «Պոլիս Լուսատու» հարթակը։
Այս ամբողջի մէջ Պերճ Արապեանի «Կարօտ- ճամբորդագրութիւն մը» անուն լուսանկարչական ցուցադրութեան ագուցուեցաւ նաեւ զրոյց մը, ուր Պերճ Արապեան ներկաներուն հետ կիսեց իր ընտանիքի գաղթի պատմութիւնը։
Այս պատումը կը սկսէր Հազրոյէն, կ՚անցնէր Ամիտա, Ղամիշլի, Հալէպ, Պէյրութ ապա Թորոնթօ եւ Պերճ Արապեանի հաշւոյն կը հասնէր Իսթանպուլ։
«Ակօս»ի վաստակաւոր լուսանկարիչի ելոյթին յաջորդեցին զանազան հարցումներ, որոնց Պերճ Արապեանի փոխանցած պատասխանները յաճախ դիմաւորուեցան ջերմ ծափողջոյններով։
«Ես կը դժուարանամ իմ տպաւորութիւնները բառերով արտայայտելու։ Ոսպնեակը իմ արտայայտուելու լաւագոյն միջոցն է» կ՚ըսէ Պերճ Արապեան։
