Հայ գերիներու ճակատագիրը անորոշ
Պաքուի մէջ բանտարկուած հայ պաշտօնական անձանց խնդիրը կը շարունակէ օրակարգ զբաղեցնել Հայաստան-Ատրպէյճան յարաբերութիւններու մէջ։ Նախորդ շաբաթավերջին Ծաղկաձորի մէջ հայ ու ատրպէյճանցի փորձագէտները քննարկեցին տարբեր հարցեր, որոնց կարգին՝ Պաքուի մէջ գերիներու վերադարձի կարելիութիւնները։ Նաեւ, Հայաստանի վարչապետը եւ Միացեալ Նահանգներու փոխնախագահը յայտնեցին, որ գերիներու հարցը քննարկուած է։ Ի դէմ այս յայտարարութիւններուն France 24-ին տուած հարցազրոյցին ընթացքին Ատրպէյճանի նախագահը վերստին պնդեց թէ Ատրպէյճանի մէջ բանտարկուած Արցախի նախկին առաջնորդները պիտի չվերադարձուին: Ալիեւ 20 տարիէն մինչեւ ցմահ բանտարկութեան դատապարտուած Արցախի նախկին ռազմաքաղաքական ղեկավարութիւնը բաղդատեց նացիական Գերմանիոյ առաջնորդներուն հետ. «Այդ մարդիկ լուրջ յանցանքներ կատարած են մարդկութեան դէմ: Պատկերացուցէք` Բ. Համաշխարհային պատերազմի աւարտին, Նիւրնպերկեան դատավարութենէն երկու ամիս անց ոմանք գային եւ ըսէին` կը խնդրենք ազատ արձակել մահուան դատապարտուած նացի առաջնորդները: Ասիկա նոյն բանն է, նոյնիսկ՝ աւելի վատ: Անոնց յանցանքները աւելի ծանր են, քան այն, ինչ որ ըրած են նացիները Բ. Համաշխարհային պատերազմին»։
Հայաստան ցարդ չէ պատասխանած Ալիեւի այս անիմաստ բաղդատութեան։
Նշենք, որ քննարկումին մասնակից Ատրպէյճանի պատուիրակներուն հետ հանդիպումներ ունեցան նաեւ արտաքին գործոց փոխնախարար Վահան Կոստանեան եւ Անվտանգութեան խորհուրդի քարտուղար Արմէն Գրիգորեան:
