Հայկական եկեղեցւոյ՝ 1188 թուականով թուագրուած բացառիկ հազուագիւտ փայտէ դուռը վերադարձուած է հայրենիք եւ այժմ կը ցուցադրուի Հայաստանի Պատմութեան Թանգարան:
Ձեռակերտ պատմական նմոյշը ձեռք բերուած է Լոնտոն՝ «Sam Fogg Gallery» պատկերասրահէն, մշակութային ժառանգութեան վերադարձի պետական ծրագրի շրջանակներով: Գնման եւ տեղափոխման համար պահեստային ֆոնտէն յատկացուած է աւելի քան 175 միլիոն դրամ (շուրջ 460 հազար տոլար):
Դռնափեղկը պատրաստուած է արեւելեան ընկուզենիէ եւ կը պատկանի Բագրատունեանց Հայաստանի դարաշրջանին:
Ցուցանմուշի պատկերագրութիւնը կը միաւորէ Աստուածաշնչեան եւ արքունական թեմաները։ Կոմպոզիցիայի կեդրոնին պատկերուած է Դանիէլը՝ առիւծներու մէջ, իսկ ստորին հատուածներուն ներկայացուած են տարբեր գազանամարտերու տեսարաններ, որոնք համեմատելի են Դանիէլի տեսիլքի խորհրդաբանութեան հետ։ (Դան. 7:1–7, 7:23–27)։ Յօրինուածքի կեդրոնական մասը կ՚ընդգծէ խաչի «թեւաւոր» տիպը՝ ծաղկային ծիլերով եւ պտղաբեր խորհրդով, որ կը համապատասխանէ հայկական եկեղեցական արուեստի կեանքի ծառի գաղափարին։
Ռատիօածխածնային վերլուծութիւնը հաստատած է անոր տարիքը, իսկ փորձագէտներ արդէն իսկ գտածոն կը համարեն երկրի միջնադարեան արուեստի ուսումնասիրման համար կարեւորագոյններէն մէկը:
Հայաստանի Կառավարութեան մամուլի ծառայութենէն տարածուած հաղորդագրութեան համաձայն՝ Վարչապետ Նիկոլ Փաշինեանը Հայաստանի Պատմութեան Թանգարան ներկայ գտնուած է միջնադարյան հայկական փայտարուեստի եզակի ցուցանմուշներէն մէկը եղող հայկական եկեղեցւոյ փայտեայ դրան փեղկի ցուցադրութեան բացման։
