Հրանդ Տինք Վարժարանի վարիչներու այցը

Ն.Ա.Տ. Սահակ Բ. Պատրիարք Հայրը 23 Դեկտեմբեր 2025, Երեքշաբթի, ընդունեց Հրանդ Տինք Վարժարանի վարիչներ՝ Արթօ եւ Դալար Հորոզօղլու ամոլը, Հերիքնազ Աւագեանն ու Լուսինէ Յարութիւնեանը։

Այցելուները յայտնեցին, որ եկած էին խնդրել Նորին Ամենապատուութեան հովանաւորութիւնն ու նախագահութիւնը Վարժարանի ի նպաստ մատաղօրհնութան հանդիսութեան, որ պիտի կատարուի յառաջիկայ 8 Փետրուար, Կիրակի առաւօտ, Ս. Աստուածածին Աթոռանիստ Մայր Տաճարի մէջ։

Պատրիարք Հայրը խոստացաւ ընդառաջել եղած հրաւէրին, նաեւ ստացաւ վարժարանի հետ առնչուած տեղեկութիւններ եւ իր գոհունակութիւնը յայտնեց արձանագրուած յաջողութեանց համար։ Հայրական թելադրութիւններ ըրաւ, կարողութիւն ու յաջողութիւն մաղթեց եւ օրհնեց Հայաստանի Հանրապետութեան հայրենակից իսթանպուլաբնակ սաներու ուսման նուիրուած իրենց կրթանուէր գործունէութեան մէջ։