Գարեգին Բ. Կաթողիկոսի Ամանորեան Պատգամը

Սիրելի՛ բարեպաշտ ժողովուրդ,

Ամանորի խորախորհուրդ այս երեկոյ Մայր Աթոռ Սուրբ Էջմիածնից յղում ենք ձեզ հայրապետական Մեր սէրն ու օրհնութիւնը եւ սրտագին շնորհաւորանքներն ու բարեմաղթանքները: Տարեմուտի սեմին Բարձրեալից հայցում ենք խաղաղութիւն համայն աշխարհին, խաղաղութիւն մեր հայրենիքին, խաղաղութիւն խռովայոյզ մեր ողջ ժողովրդին:

Անցնող տարին ազգիս համար լի էր տագնապալի իրադարձութիւններով` հասարակութեան մէջ տեղ գտած պառակտումներով, ատելութեան ու անհանդուրժողութեան դրսեւորումներով: Ցաւօք, Նոր տարի մուտք ենք գործում նաեւ Հայոց եկեղեցու եւ հոգեւոր դասի թիրախաւորման մտահոգիչ պայմաններում: Շարունակում են բանտերում ապօրինաբար արգելափակուած մնալ եկեղեցականները, ազգային բարերարը եւ նուիրեալ հայորդիներ:

Տարեմուտը, սիրելիներ, հրաւէր է նորոգուելու, վանելու մեր կեանքից մերժելի իրողութիւնները, սրբագրելու մեղսալի ու կործանարար ընթացքները, դադարեցնելու եղբայրադաւութեան քայլերը, ի սպառ բացառելու ատելութիւնն ու թշնամանքը, անհանդուրժողութեան եւ անօրինականութեան յանցաւոր երեւոյթները: Մենք Աստծոյ ժողովուրդ ենք, իսկ «Աստուած խռովութեան Աստուածը չէ, այլ` խաղաղութեան», հռչակում է Սուրբ գիրքը (Ա Կոր. 14:33): Մեր կեանքում երկնապարգեւ խաղաղութիւնը, օրհնութիւններն ու շնորհները հաստատուն են մնում միմեանց նկատմամբ սիրոյ, ներողամտութեան եւ համերաշխութեան դրսեւորմամբ:

Յիրաւի, խաղաղութեան եւ սիրոյ մէջ է գործում Աստուած, եւ իրական սէրն ու ներքին խաղաղութիւնն են բարիք դառնում թէ՛ անհատի եւ թէ՛ ժողովրդի համար: Ազգը զօրեղ է, եւ պետութիւնը` անսասան, երբ անխաթար են նուիրական արժէքները, աւանդոյթներն ու նախնեաց ժառանգութիւնը, երբ որեւէ պատրուակով չի ձեւախեղւում պատմական յիշողութիւնը, կասկածի տակ դրւում մեր սուրբ եկեղեցու բազմադարեայ առաքելութիւնը: Այսօր ընդդէմ եկեղեցու կատարուող պառակտիչ գործողութիւնները, որ արդարօրէն առաջ են բերում մեր հաւատաւոր զաւակների ընդվզումը հայրենիքում եւ սփիւռքում, չունեն որեւէ արդարացում եւ չեն ունենայ շահեկան արդիւնք: Եկեղեցին չի պատկանում որեւէ դարաշրջանի, որում ապրում է, այլ` միայն Քրիստոսին:

Առաքելահիմն Հայոց եկեղեցին քրիստոսահաստատ Սուրբ Էջմիածնով Երկնաւորի շնորհն է մեր ժողովրդին` ազգանուէր, հայրենաշէն ու հայապահպան իր ծառայութեամբ:

Տարեմուտի խորհրդաշատ այս պահին, սիրելիներ, հայրապետիս յորդորն է` ամուր եւ աներեր պահենք մեր հաւատը, դժուարութիւններին արիաբար դիմակայելու կամքն ու վճռականութիւնը: Թոյլ չտանք, որ անցնող տարուայ փորձութիւնները կարծրացնեն մեր սրտերը, յարմարուողականութիւնն ու անտարբերութիւնը լինեն մեր ուղեկիցը` տկարացնելով մեր յոյսը եւ թուլացնելով մեր ազգային ոգին: Աննուազ նախանձախնդրութեամբ գործենք` յանուն արցախահայութեան իրաւունքների պաշտպանութեան եւ Պաքւում անմարդկային նուաստացումների ենթարկուող մեր հայրենակիցների ազատ արձակման: Սէրն առ հայրենին, առ մեր ժողովուրդը եւ Մայր եկեղեցին դարձնենք առանցքը մեր կեանքի, ներշնչող ուժը խիզախումների ու յանձնառութիւնների, իմաստաւորումը ամէն զոհողութեան: Բարի եւ արժանապատիւ ընթացքով վերահաստատենք եղբայրսիրութեան, փոխադարձ յարգանքի, զօրակցութեան մթնոլորտը մեր հայրենիքում, ազգային կեանքում եւ միջանձնային յարաբերութիւններում:

Դժուարին այս շրջանը, անտարակոյս, պիտի յաղթահարենք մեր լոյս հաւատի, մեր միասնականութեան, հաստատակամութեան ու տոկունութեան շնորհիւ` ունկնդիր առաքելական պատգամին. «Միաբա՛ն եղէք, խաղաղութի՛ւն արէք, եւ խաղաղութեան ու սիրոյ Աստուածը թող լինի ձեզ հետ» (Բ. Կոր. 13:11):

Աղօթենք Հայոց բանակի սպաների եւ զինուորների, նեղութիւնների ու կարիքի մէջ գտնուողների, գերեվարուած ու անյայտ կորած եւ բանտերում արգելափակուած մեր զաւակների ու նրանց ընտանիքների համար: Առ Տէրն ապաւինութեամբ թող մեր հայեացքը դէպի ապագան համակուած լինի լաւատեսութեամբ, որով 2026 թուականը կարող պիտի լինենք դարձնել նոր հնարաւորութիւնների տարի` առաւել ամրացնելու եւ զօրացնելու մեր պետականութիւնը, ազգային ինքնութիւնն ու հոգեւոր մեր կեանքը: Ըստ առաքեալի պատգամի` ընթանանք ինչպէս լուսոյ որդիներ, քանզի լուսոյ պտուղներն են բարութիւնը, արդարութիւնը եւ ճշմարտութիւնը (հմմտ. Եփ. 5:8-9): Թող Աստծոյ սէրն ու շնորհները միշտ սփռուած լինեն հայրենական ու ազգային մեր անդաստանում եւ ամէնքիս սրտերում:

Աստուած օգնական եւ պահապան մեր հայրենիքին եւ աշխարհասփիւռ մեր ժողովրդին այսօր եւ միշտ եւ յաւիտեան:

Շնորհաւոր Նոր տարի:

ԳԱՐԵԳԻՆ Բ. ԿԱԹՈՂԻԿՈՍ ԱՄԵՆԱՅՆ ՀԱՅՈՑ