Գընալը կղզիի մէջ մտահոգիչ դէպք
ՄԻՐԱՆ ՄԱՆՈՒԿԵԱՆ
[email protected]
ՄԻՐԱՆ ՄԱՆՈՒԿԵԱՆ
[email protected]
Նախորդ Կիրակի օր հայաբնակ Գընալը կղզիի մէջ պատահած դէպքը անգամ մը եւս օրակարգի կը դնէ ամառնային հանգստավայրի այս շրջակայքին մէջ անվտանգութեան խնդիրը։ Դէպքը պատահած է 12 Օգոստոս Կիրակի երբ տասնամեայ պատանին կը փորձէր իր բնակարանին հարեւանութեան գտնուող Սուրբ Գրիգոր Լուսաւորիչ եկեղեցին երթալ դաշնամուրի դասընթացքին մասնակցելու համար։ Օտարականներ յանկարծակիօրէն դէմը ելած եւ արգելք եղած են պատանիի շարժման։ Փորձած են տուրմ մատուցել ու երբ երեխան մերժած է այս անգամ ալ սպառնացած։ Բարեբախտաբար տասնամեայ պատանին ուշիմ գտնուած ու դիմած է բախուստի։ Ընտանիքը դէպքը լսելով իսկոյն դիմած է կղզեաց ոստիկանութեան, որոնք փորձած են մանրամասնութիւններ ստուգել, քննելով տարածքին վրայ գործող տեսախցիկները։ Սակայն շուտով պարզուած է որ այդ տեսախցիկները չեն կրցած գործի ծառայող տեսանիւթեր որսալու։ Թէեւ տարածքաշրջանին վրայ կը գտնուի թէ Սուրբ Գրիգոր Լուսաւորիչ եկեղեցին եւ թէ Կազդուրման կայանի տարածքը քննարկող տեսախցիկներ։
Կղզիներու հարթակի անդամ Նուրհան Չէթինքայա կը կարեւորէ այս մանրամասնութիւնը եւ կը մեկնաբանէ թէ դէպքը իրականացնողները եթէ իրենք կղզիաբնակ չեն, անպայման ունին կղզիին ծանօթ բարեկամներ։ «Ուրիշ տեսակ կարելի չէ գիտնալ տեսախցիկներու տեսողական դաշտէն դուրս մնացած տարածքները։ Եթէ տեսախցիկներուն երեւէին կղզիի ոստիկանութիւնը պիտի կրնար անոնց ինքնութիւնը պարզել։ Ամէն պարագային Գընալը կղզիի մէջ ոստիկաններու թիւն ալ բաւական քիչ են»։
Կազդուրման կայանի տնօրէնուհի Ազնիւ Մեզատուրեան Ակօսին կը փոխանցէ թէ. «Կայանի տարածքը կը հսկուի 22 տեսախցիկներով։ Այդ տեսախցիկներէն մէկն է որ պէտք էր տեսնէր դէպքի վայրը, բայց անոր ալ ուղղութիւնը շեղուած էր։ Այդ շեղումը երկու պատճառներով կարելի է բացատրել, կամ աղբահաւաք բեռնատարը սխալմամբ դպչած է կամ ալ դէպքի հեղինակները դիտումնաւոր կերպով տեսախցիկին ուղղութիւնը փոխած»։ Պատահարը բնականաբար մտահոգութիւն յառաջացուցած է կղզիի բնակիչներուն մէջ, քանի որ այդ տարածքի նախընտրման գլխաւոր պատճառը դիտուած է անչափահասներու ազատ ժամանցը։ Իսկ մտահոգիչ է երբ այդ ազատ տարածքն ալ հարցական պիտի դառնայ մանաւանդ բոլոր այն ծնողներուն համար, որոնք անչափահաս երեխայ ունին։
