Մօտ երկու հարիւր էջերէ բաղկացեալ հատորը խնամեալ աշխատանքի արդիւնք է։ Հատորին մէջ տեղ կը գրաւեն Հայ Եկեղեցւոյ նուիրապետական Աթոռներու գահակալներու խօսքերը, յոբելեար Սրբազան Հօր կենսագրութիւնը, արտասահմանէն ու քաղաքէս տասը հոգեւոր հայրերու, Պոլսահայ մամուլի ներկայացուցիչներու եւ աշխարհական զանազան անհատներու վկայութիւնները, ինչպէս նաեւ նկարներու ճոխ ալպոմ մը։
Աւելի քան հարիւր նկարներէն բաղկացեալ այս ալպոմը Յոբելեար Սրբազան Հօր կեանքին առընթեր, որոշ չափով լոյս կը սփռէ այդ շրջանի համայնքի պատմութեան։
Յուշամատեանը հրատարակութեան պատրաստած է Աթոռոյս Հրատարակչութեան Բաժանմունքի Տեսուչ Հոգշ. Տ. Յովակիմ Վրդ. Սերովբեան։ Հրատարակութեան խորհրդականներ եղած են Վարանդ (Յակոբ) Քորթմոսեան եւ Արա Գօչունեան։ Ներդրում ունեցած է նաեւ Սէրտա Արսլան։ Նկարներու ձեւաւորումը կատարած է Արիս Քարանֆիլը։ Տպագրութեան պատրաստութեան փուլին պատասխանատու եղած ու տպագրութեան հսկած է Մանասէ Թաշճըն։
Աթոռոյ յուշամատեաններու քառակուսի ծաւալով (21*21սմ.) հատորի գեղեցիկ կողքը պատրաստուած է Կարօ Վ. Պապայեանի կողմէ եւ լուսանկարիչն է Մկրտիչ Արծիւեան։
Սոյն հատորի մեկենասութիւնը ստանձնած է յոբելեար Սրբազան Հօր եպիսկոպոսական ձեռնադրութեան կնքահայր բարերար Հայկ Արսլանեան։



