Եւրոպայի Մարդու Իրաւունքներու Ատեանը Անգամ մը եւս ժողով կը գումարէ Կէզի զբօսայգիի դէպքերու պատճառաւ ցկեանս բանտարկութեան դատապարտուած Օսման Քաւալայի համար։ ԵՄԻԱ-ի մեծ ժողովը կը բաղկանայ 17 դատավարներէ եւ Վճռաբեկ Ատեանի դերակատարութիւն կ՚ունենայ։ Ժողովի նիստէն ետք իսկոյն վճիռի մը յայտարարութիւնը չակնկալուիր։ Սակայն դատարանը Քաւալայի այս երկրորդ դիմումը ընդունած է որպէս առաջնակարգ։ Արդարեւ վճիռը պիտի ունենայ վերջնագիրի բնոյթ եւ պիտի յայտարարուի յառաջիկայ ամիսներու ընթացքին։
Հասարակական գործունէութիւններով ծանօթ Օսման Քաւալա «Կէզի» զբօսայգիի դէպքերու կապակցութեամբ ձերբակալուած էր 1 Նոյեմբեր 2017-ին։ Ան 2020-ին անպարտ հռչակուեցաւ այս մեղադրանքէն։ Երբ շատեր զինք դիմաւորելու համար փութացին Սիլիվրիի արգելանոցը, իսկոյն առաջադրուեցաւ նոր մեղադրանք մը, այս անգամ սահմանադրական կանոնը վերացնելու փորձի շրջանակով եւ Քաւալա կրկին բերման ենթարկուեցաւ եւ ապա ձերբակալուեցաւ։ Քաւալա կը մերժէ իրեն ուղղուած մեղադրանքները, պնդելով որ իր դէմ անհիմն մեղադրանքներ եւ սուտ յայտարարութիւններով ընթացող դատավարութիւն մը կատարուած է։ Քաւալայի խնդիրը ի սկզբանէ կը զբաղեցնէ ԵՄԻԱ-ի օրակարգը։ Եւրոպական դատարանը 10 Դեկտեմբեր 2019 թուականին արձակած վճիռով հաստատեց թէ Թուրքիա ձերբակալութեան եւ դատավարութեան շրջանին ոտնակոխած է Եւրոպայի Մարդու Իրաւունքներու յայտարարութեան ազատութեան եւ անվտանգութեան իրաւունքները դասաւորող հինգերորդ եւ տասնութերորդ յօդուածները։
Նոյն որոշումին մէջ ընդգծուած է այս վճիռներուն գերակայութիւնը եւ պահանջուած է, որ Քաւալա իսկոյն ազատ արձակուի։
Թուրքիա մերժեց այս դատական վճիռը, որու հետեւանքով Եւրոպայի Խորհրդարանի Նախարարաց խորհուրդը շարժման անցաւ Անգարայի դէմ։
Քաւալա 18 Յունուար 2024-ին կատարած երկրորդ դիմումով Եւրոպական դատարանին փոխանցեց իրեն դէմ գործադրուող իրաւական անօրինութիւնները։ Ան այսպէսով ակնարկեց անմարդկային եւ նուաստացնող վերաբերմունք, ազատութեան եւ ապահովութեան իրաւունքի, արդար դատուելու իրաւունքի, առանց օրինական նշումի պատիժ չկիրարկուելու սկզբունքի, արտայայտուելու ազատութեան, հանրահաւաքներու եւ միութիւն կազմելու ազատութեան եւ իրաւունքներու սահմանափակումի խնդիրները։
Նշենք թէ Նախագահ Էրտողան 2021-ին ունեցած ելոյթով անգոյ համարած էր ԵՄԻԱ-ի Օսման Քաւալայի եւ Սելահատտին Տեմիրթաշի մասին կայացուցած վճիռները։
