Թուրքիոյ Հայոց Սահակ Բ. Սրբազան Պատրիարքը ընկերակցութեամբ Արամ Արք. Աթէշեանի 14 Ապրիլ երեքշաբթի յետմիջօրէին փափկավարական այցելութիւնով մը պատուեց «Ակօս»ի խմբագրատունը, շնորհաւորելու համար թերթի հիմնադրութեան 30 ամեակը։
Այս ուրախ առիթով «Ակօս»ի անձնակազմը գլխաւորութեամբ խմբագրապետ Եդուարդ Տանձիկեանի, առիթը ունեցաւ մտերիմ զրոյցի մը մասնակցելու Սրբազան Պատրիարքի եւ Արամ Արք.-ի հետ։
Թէ՛ խմբագրապետ Տանձիկեան եւ թէ ակօսականներ սրբազաններուն դիմեցին զանազան հարցումներով, ընդգծելով թէ այս զրոյցը պաշտօնական բնոյթ չունի եւ ուղղուած է միայն ու միայն միտքեր զբաղեցնող հարցումներու լուսաբանման։
Սրբազանները բարի գտնուեցան բոլոր հարցումներուն նոյն մտերմութեամբ պատասխանելու։
Մինչ այդ յիշուեցաւ երջանկայիշատակ Մեսրոպ Բ. Պատրիարքի նպաստը, յատկապէս թերթի հիմնադրութեան եւ ապա լոյս տեսնելուն յաջորդող ժամանակներու ընթացքին։
Ապա սրբազանները շրջեցան Անարատ Յղութիւն շէնքի բաժանմունքները, այցելեցին նաեւ Հրանդ Տինք հիմնարկի գրասենեակը եւ ստացան լրացուցիչ տեղեկութիւններ կատարուած եւ կանխատեսուած աշխատութիւններու մասին։
