Սպաննուած է մարդկային իրաւանց պաշտպան Ալի Այտըն

14 Յունուարի առաւօտեան ժամերուն գործուած ոճիրի մը զոհ գացած է Մարդու Իրաւունքներու Միութեան Զմիւռնիոյ համանախագահ, իրաւապաշտպան Ալի Այտըն։

Ան առաւօտուայ ժամերուն ինչպէս սովորաբար կ՚ընէր ամէն օր, մեկնած է մօտակայ անտառը շրջելու, բայց չէ վերադարձած։

Ալի Այտընի կնոջ ահազանգէն ետք ոստիկանները յայտնաբերած են մարդու իրաւունքներու գործիչի անշունչ մարմինը, իր տան ճամբուն վրայ։

Դատախազութիւնը յայտարարած է թէ Ալի Այտըն ոճիրի մը զոհ գացած է եւ հիմա պիտի աշխատին սոյն ոճիրի հեղինակը յայտնաբերելու։

Այտընի կինը եւ գործընկերները կը յայտնեն թէ որոշ կասկածեալ մը չունին, քանի որ չէին լսած իրեն սպառնացող մէկու մը մասին։