Արձանագրութիւնները բաց ե՜ն
Սկսած են «Զարմանազան 2026»-ի դիմումները ընդունուիլ
«Գալուստ Կիւլպէնկեան» հիմնարկութեան Հայկական բաժանմունքը կը տեղեկացնէ, որ 10-րդ «Զարմանազան» ամառնային արեւմտահայերէն ծրագիրը տեղի պիտի ունենայ Ֆրանսայի Ալպեան լեռներու Ապոնտանս գիւղին մէջ` 10 Յուլիսէն 5 Օգոստոս 2026:
Զարմանազանը բաց է Սփիւռքի 10-էն 24 տարեկան բոլոր պատանիներուն եւ երիտասարդներուն։
Տեղի կ՚ունենայ նաեւ Սփիւռքի արեւմտահայերէնի ուսուցիչներուն ուղղուած համալսարանական ծրագիր մը՝ Փարիզի Ինալքօ համալսարանին հետ համագործակցութեամբ։
Կեցութեան օրեր՝
10-էն 17 տարեկան պատանիներ՝ 10 Յուլիս — 5 Օգոստոս 2026,
18-էն 24 տարեկան երիտասարդներ՝ 2 Յուլիս — 8 Օգոստոս 2026*
Ուսուցիչներ՝ 10 Յուլիս — 5 Օգոստոս 2026։
Բոլոր դիմումները կ՚ընդունուին մինչեւ Փետրուար 22, 2026, Կրինիչի միջին ժամով՝ 23։00։
Եթէ կ՚ուզէք մասնակցիլ 2026-ի ծրագրին, հաճեցէ՛ք լրացնել ձեր խումբին յատուկ պատրաստուած հարցարանը՝ հետեւելով ստորեւ դրուած յղումին։ Կը յայտնենք, որ բոլոր դիմումները լրջօրէն կ՚ընդունուին։ Եթէ ձեր գաղափարը փոխէք կամ այլեւս չուզէք մասնակցիլ Զարմանազանին, մինչեւ Փետրուար 22, 2026 պէտք է ձեր դիմումը ջնջէք։
Զարմանազանի մասին՝
Զարմանազանը ստեղծագործական մօտեցում ունեցող լեզուական խտացեալ ծրագիր մըն է։
Իր մանկավարժական հիմքով լեզուն կը զետեղէ առօրեայ կեանքին եւ բոլոր յաւելեալ աշխատութիւններուն կեդրոնը։ Զարմանազանին մասնակցելու համար լեզուական որոշ մակարդակ մը չի պահանջուիր։
Անիկա կազմակերպուած է Լիոնի «Հազար ու մէկ աշխարհ» ընկերակցութեան եւ «Ինալքօ»-ի հետ համագործակցութեամբ: Ծրագիրը վաւերացուած է Ֆրանսայի կրթական նախարարութեան կողմէ:
Յաւելեալ տեղեկութիւններու համար այցելել Զարմանազանի կայքէջը։
