Սիմոն Չեքեմ չի վհատիր

Արդէն բազում ազդանշաններ կային, որ Պէյօղլու թաղի Սուրբ Երրորդութիւն Եկեղեցւոյ թաղական խորհուրդի ընտրութիւնները հեզասահ բնոյթ մը պիտի չունենան։

Նախկին թաղականութիւնը համարեա միահեծան կերպով ներկայացնող փաստաբան Սիմոն Չեքեմ եւ անոր նշանակած ընտրութեան յանձնախումբը ամէն միջոցի դիմած էր ընտրութիւնը կացինահարելու համար։

Երբ բոլոր թաղերու համար տարբեր ընտրատարածքներու մէջ սնտուկներ կը տեղադրուէին բարձր մասնակցութիւն ապահովելու միտումով, Երրորդութեան ընտրութեան յանձնախումբը կը բռնէր հակառակ դիրք եւ կը պահանջէր, որ բոլոր ընտրողները միայն մէկ սնտուկի մէջ գործածեն իրենց քուէները։

Վաքըֆներու Շրջանային Տնօրէնութիւնը միջամտեց այս ընթացքին եւ աւարտին Սիմոն Չեքեմին հակառակ դիրք բռնողները ապահովեցին ձայներու ջախջախիչ մեծամասնութիւնը։

Չեքեմ անվհատ կերպով շարունակեց իր պայքարը ի դէմ Վաքըֆներու Շրջանային Տնօրէնութեան։

Այսպէս առաջին աստիճանի դատարանը ընդունելի գտաւ դիմումնատիրոջ պահանջը։

Դատարանը վճիռ կայացուց ընտրութիւնը կրկնելու համար։

Այդ որոշումին դէմ կատարուած առարկութիւնն ալ մերժուեցաւ Վերստուգող դատարանին կողմէ 30 Դեկտեմբեր 2025 թուակիր դատական նիստի աւարտին։

Այժմ հարցական է թէ Վաքըֆներու Շրջանային Տնօրէնութիւնը այս որոշումին դիմաց պիտի երթա՞յ Վճռաբեկ Ատեան թէ ոչ պիտի գործադրէ դատարանի որոշումը։

Եթէ այս երկրորդ հաւանականութիւնը ի զօրու ըլլայ, Երրորդութեան թաղական խորհուրդը պիտի հարկադրուի ընտրութիւնը կրկնելու։