Սուրիոյ եւ Սուրիոյ ժողովրդավարական ուժերու միջեւ նոր համաձայնութիւն
Սուրիոյ կառավարութիւնը Սուրիոյ ժողովրդավարական ուժերու հետ համապարփակ զինադադարի համաձայնութեան եւ աստիճանական համարկման գործողութեան շուրջ փոխհասկացողութեան գոյացումը յայտարարեց:
Սուրիոյ ժողովրդավարական ուժերը իրենց կարգին յայտարարեցին, թէ գոյացած համաձայնութիւնը կ՛երաշխաւորէ զինադադարը եւ երկու կողմերուն միջեւ հաստատութիւններու, զինուորական, ապահովական ուժերու եւ վարչական կառոյցներու աստիճանական համարկումի հոլովոյթի մը սկիզբը:
Անոնք աւելցուցին, որ համաձայնութիւնը կը ներառէ զինուորական ուժերու հեռացում շփման գիծերէն եւ ներքին գործոց նախարարութեան ապահովական ուժերու մուտքը հիւսիսային Սուրիոյ մէջ Հասաքէի եւ Գամիշլիի կեդրոններ, ինչպէս նաեւ կազմութիւնը զինուորական խումբի մը, որ կը ներառէ Սուրիոյ ժողովրդավարական ուժերու զօրամասերը:
«Նշանակալից, Խոր Ու Պատմական Պահ»
Սուրիոյ հարցով ամերիկացի պատուիրակ Թամ Պարրաք ողջունեց Սուրիոյ կառավարութեան ու քրտական ուժերուն միջեւ գոյացած համաձայնութիւնը` բարձր գնահատելով «յանդուգն քայլերը», որոնք երկու կողմերը որդեգրած են:
Պարրաք համաձայնութիւնը որակեց «Սուրիոյ դէպի ազգային հաշտութիւն, միասնութիւն եւ տեւական կայունութիւն երթին մէջ նշանակալից, խոր ու պատմական պահ»:
