Իսթանպուլի ընտրուած քաղաքապետը եւ իր հետ բազմաթիւ քաղաքապետեր կամ զանազան քաղաքապետարաններու բարձրաստիճան պաշտօնէութիւնը ձերբակալուելէ տարի մը ետք այս երրորդ շաբաթն է որ սկսած են դատուիլ։
Իրենց ուղղուած մեղադրանքները քաղուած են զանազան զրպարտութիւններով։ Այս բառը յստակ կը գործածենք, քանի որ զրպարտութիւններու հեղինակներն ալ դատավարութեան ընթացքին կը մերժեն իրենց նախկին ցուցմունքները։
Իրականութեան մէջ այս դատավարութեան մեկնակէտը պէտք է դիտել նախագահ Էրտողանի նախընտրական քարոզարշաւի ժամանակ հնչեցուցած սպառնալիքներով։ Էրտողան յատկապէս երկրի հարաւ արեւելեան քաղաքներու քարոզարշաւին ժամանակ զգուշացուցած էր ընտրողները, ըսելով որ «Եթէ սխալ նախընտրութիւն ընէք մենք իսկոյն կը միջամտենք եւ դարձեալ տեղապահներ կը նշանակենք ընտրուածներու փոխարէն»։
Զարմանալի է որ դատավարութեան ընթացքին ոչ ոք կը յիշէ նախագահի այդ ելոյթը որ ինքնին կը բացատրէ այսօր անհիմն մեղադրանքներով ընթացող դատավարութիւնը։
Միւս կողմէ ընդդիմադիր քաղաքապետները իրենց պաշտօնակոչումով իսկ թափ տուած էին պաշտօնավարած տարածքի բնակիչներուն ուղղեալ ծառայութիւններու ծաւալը եւ մակարդակը բարձրացնել։
Աժան եւ որակաւոր սնունդ ապահովող ճաշարանները, մանկամսուրներու բացումը եւ նման բնոյթի ծառայութիւնները կ՛երաշխաւորէին յաջորդ ընտրութիւններու եւս յաղթանակով աւարտուելու վարկածը ի շահ ընդդիմութեան։ Այս բոլորը գործող իշխանութիւններու համար լուրջ վտանգներ ներկայացան եւ կառավարութիւնը դիմեց քաղաքապետարաններու աշխատանքը կացինահարող քայլերու։
Յատկանշական է Շիշլի թաղի մէջ բարձրացող երկնաքերի շինութեան կասեցումը։ Ընդդիմադիր քաղաքապետ Ռեսուլ Էմրահ Շահան արգելք եղաւ այդ երկնաքերի շինութեան, դիտել տալով որ այն բարձրայարկ շինութիւնը իր հետ պիտի բերէ ենթակառուցուածքային բազում խնդիրներ։ Իր ձերբակալութենէն ետք պաշտօնակոչուած տեղապահի առաջին որոշումը եղաւ շինութեան վերսկսիլը։
Ուրեմն այս բոլորը կ՚ապացուցեն թէ քաղաքապետարաններու դէմ յարուցուած դատական խնդիրներու ետին կայ շատ աւելի խորքային այլ հաշիւներ։ Իսկ գործող կառավարութիւնը իր հետապնդած այս ռազմավարութիւնով արդեօք պիտի յաջողի վերաշահիլ ժողովուրդի վստահութիւնը։ Խիստ կասկածելի է այս մէկը, քանի որ հասարակութիւնը նոյնիսկ որ ճնշումներու հետեւանքով անձայնութեան մատնուած ըլլայ, իրականութեան մէջ յստակօրէն կը գիտակցի եղելութիւններուն, որոնց պատասխանը պարլ կը դառնայ առաջին ընտրութեան պահուն իսկ։ Ճիշդ ալ այս պատճառաւ է, որ այժմ շատեր հարցականի տակ կը դնեն ընտրութիւններու կայացման հաւանականութիւնը։ Այնպէս թէ այսպէս անարդար կերպով ճաղերու ետեւ դրուած բազմաթիւ քաղբանտարկեալներ իրենց ազատութիւնը կապած են այդ ընտրութիւններու։ Ընտրութիւնները իրենց միակ յոյսն է, քանի որ մենատիրական համակարգը բոլորովին քաղաքականացուցած եւ իրեն ենթակայ դարձուցած է արդարադատական համակարգը։ Իշխանութիւններու համար անբաղձալի վճիռներ արձակող դատաւորները իսկոյն կը պաշտօնազրկուին, կ՚աքսորուին հեռաւոր քաղաքներ կամ ալ կը պաշտօնակոչուին աւելի նուազ նշանակութիւն ունեցող պարտականութիւններու։
Այս ընդհանուրին մէջ կարծես բնական երեւոյթ է տնտեսական ճգնաժամը, քանի որ ներկայ դրութեան մէջ աւելի մեծ շահողը ոչ թէ արտադրողներն են, այլ դրամական վերիվայրումներէն լաւագոյնս օգտուողները։
